嚟緊復活節四日假有咩搞作？約朋友去嘆返個afternoon tea就最開心啦～今期唔少餐廳都推出以春日或朱古力作主題嘅下午茶，睇吓邊個啱你食～

童話森林主題下午茶 Uptop Bistro & Bar   

以童話森林為主題，再將現場佈置成充滿綠色植物、花朵同森林小屋等元素，超有童話氛圍。多款甜鹹點更以各種植物造型呈現，好似抹茶意大利奶凍用鮮奶忌廉混入雲呢拿油，製成可愛嘅蘑菇形狀，超適合打卡！而士多啤梨提拉米蘇選用三款唔同嘅甜酒製作，淡淡咖啡香同酒味配上特選意大利軟芝士，口感綿密。鹹點方面供應煙燻帶子伴車厘茄、煙三文魚慕絲脆撻、泰式檳寧香烤雞鎚等，全部都好吸引。

供應時間：2024年3月11日起至另行通知

「戀暖春日」下午茶 樂聚廊   

春天係士多啤梨收成季節，呢個下午茶以士多啤梨為主角，酸甜滋味巧妙咁融入各式鹹甜美點，真係好啱春天！模仿原粒士多啤梨造型嘅士多啤梨香檳慕絲蛋糕好幼滑，一啖入口滲出微甘香檳芳香；士多啤梨拿破崙夾上香滑吉士，配上香甜士多啤梨，層次豐富，甜而不膩。鹹點就有意式風乾火腿配香醋士多啤梨同士多啤梨帶子他他，後者口感軟嫩，鹹甜交織好清新。

供應時間：即日至2024年4月14日

「夢境森林」下午茶 FINDS  

同著名台灣芳療品牌合作推出夢境森林下午茶，以三款睡眠噴霧嘅主要成分入饌，例如佛手柑、橙花、蜂蜜、椰子、薰衣草、洋甘菊等。最吸睛係漂浮之島配薰衣草雲呢拿醬，輕盈嘅蛋白脆餅彷如雲朵般，輕放於薰衣草雲呢拿醬上。椰林飄香意式奶凍則以椰子蘭姆酒入饌，椰子味香濃帶有淡淡酒香；而天使蛋糕卷配佛手柑奶酪令蛋糕添上佛手柑獨特香氣。

供應時間：即日起至2024年5月13日

比利時朱古力下午茶 Three on Canton  

全新比利時朱古力下午茶以高質素比利時朱古力入饌，創作出多款造型精緻嘅鹹甜美點。鹹點有酥脆嘅黑朱古力牛肉酥盒同朱古力香腸卷，完美融合可可嘅甘甜同牛肉嘅鹹香，滋味無窮。至於甜點包括比利時脆朱古力蛋糕同七彩朱古力窩夫條，前者外脆內鬆軟，朱古力味好濃厚；後者啱晒相機食先。

「春日獻禮」朱古力下午茶 香港嘉里酒店 大堂茶座  

另一間推出朱古力下午茶嘅餐廳，朱古力甜點款款皆別出心裁～黑朱古力蕎麥茶蛋糕卷用上科曼圖80%黑朱古力，搭配酸酸甜甜嘅紅桑子啫喱，微甘之餘呈現出濃郁果香。牛奶朱古力柚子蛋糕以吉瓦那40%牛奶朱古力搭配香脆榛子果仁脆脆，為柔滑嘅朱古力增添豐富口感，並散發清幽淡雅嘅柚子氣息。黑朱古力熱情果蛋糕則以杏仁蛋糕為餅底，配上峇裏庫斐68%黑朱古力，濃而不膩。鹹點幾推介金莎朱古力鴨肝醬，香脆嘅榛子朱古力外殼包裹住濃郁豐腴嘅鴨肝醬慕斯，味道意外地夾。

供應時間：2024年3月1日起至5月31日 

文：Yanica
編：Cathy