一連幾日嘅復活節假期，當大人同細路都有假放嘅時候，就梗係親子同樂嘅機會啦！去食自助餐就係一個唔錯嘅選擇啦。有唔少得意復活節甜品可以畀小朋友可以邊玩邊食，大人就可以慢慢嘆住食，起碼唔使趕住走先。而且唔少復活節限定自助午餐仲有啲小朋友專屬環節，唔怕悶親小朋友！
 

攤位遊戲節目多　帝苑廳

帝苑廳喺復活節期間推出自助午餐，特別供應多款以「蛋」做主題嘅菜式。仲有連串小朋友專屬嘅精彩節目，有扭汽球班、同卡通復活兔同埋小丑合照仲有兒童面部彩繪、水彩紋身等攤位。另外仲有帝苑酒店嘅人氣蝴蝶酥製作班，畀咁多位小朋友做小廚師。而對大人嚟講，最吸引嘅就梗係極受歡迎嘅「小童免費」優惠啦！

復活節繽紛自助午餐
供應日期：4月19至22日
價錢：成人 $388/位 ，3至11歲小童$208/位
＊每兩位成人惠顧「復活節自助午餐」，一位小童即可免費享用
＊於4月8日前預訂，成人更可享85折早鳥優惠，詳情請到網站查詢
 

韓流搶鮮夠新意　尚廚

尚廚全新推出嘅「韓流」主題自助晚餐，除咗有口感軟嫩嘅韓牛之外，仲有滋補十足嘅韓式鮑魚人參雞湯，同韓式牛肉拌飯等選擇。而且喺每晚19:30，廚師會敲鐘推出特級牛骨韓式雪濃湯配花膠！而小朋友可以留意返復活節限定嘅可愛造型甜品，可愛嘅兔兔造型，睇怕小朋友都唔捨得食。自助晚餐就另有糖皮裝飾小手工作坊，啱哂鍾意自己整嘢食嘅小朋友參加！

「韓流搶鮮嚐」自助晚餐
供應日期： 4月1日至5月31日（18:30-21:30）
價錢：自助晚餐（星期一至五）成人$508/位，長者$408/位，小童$308/位；（星期六、日、公眾假期及前夕）成人$548/位，長者$4４8/位，小童$348。
＊4月19至22日復活節期間，每兩位付全費之成人，可攜同一位12歲以下小童免費享用尚廚自助晚餐
＊4月7日前網上預付4月自助餐可享7折 週末及公眾假期適用，詳情請到網站查詢
 

邊食邊玩「尋彩蛋」　Bathers

坐擁無敵大嶼山海景嘅Bathers將會喺復活節頭一日舉辦兩場復活節彩蛋尋寶活動，彩蛋會預先埋喺沙灘入面，畀小朋友係指定時間內掘出，緊張刺激，重點係可以畀小朋友係戶外發洩精力！除咗尋彩蛋遊戲，仲有多個好玩親子互動遊戲，同埋特別獎品。而半自助午餐有唔少冷盤選擇、仲有特色主菜同埋精緻甜品拼盤。

復活節半自助午餐
供應日期：4月19日（11:00起）
價錢：成人HK$395/位，小朋友HK$290/位（4至12歲， 3歲以下幼童需由成人陪同方可參加活動）
＊彩蛋尋寶遊戲人數有限，敬請預早網上購票，詳情請到網站查詢　

邊食邊學整甜品　2+2 Café

2+2 Café今年嘅復活節自助餐以和風美饌為主題，炙燒波士頓龍蝦、吉列炸和牛扒、鮑魚三文魚籽蟹肉茶碗蒸、火炙黑松露三文魚壽司等都係回本必試美食！亦有復活節彩虹蛋糕、雞仔慕絲蛋等應節食品。同時小朋友仲可以參加盆栽甜品DIY工作坊、奇趣復活蛋DIY，同小丑扭氣球，令佢哋變身小廚師。

復活節「繽紛奇趣」海鮮自助晚餐
供應日期：4月19至22日
價錢：（全時段18:00-21:00）成人$638/位，小童＄538/位；（第一時段17:45-19:45）成人$538/位，小童＄438/位；（第二時段20:00-22:15）成人$518/位，小童＄418/位
＊用OpenRice優惠券可享優惠價，詳情請到網站查詢
 

食盡海、陸、空美食　Park café

Park café嘅復活節自助餐就啱晒食得嘴刁嘅家庭，皆因今次自助餐真係食勻海、陸、空嘅美食，有鵝肝醬鮑魚海鮮薯蓉釀海螺、瑞士汁慢煮乳鴿同加拿大鱈場蟹腳生蠔海鮮拼盤，食完大滿足。復活節期間除咗多款自助餐美食之外，仲會特別推出復活節主題甜品：火焰復活蛋，最啱打卡！

復活節自助晚餐
供應日期：4月19至22日（18:30-21:30）
價錢：成人$528/位，小童＄348/位
＊4至11歲之小童可享半價惠顧
＊ Facebook優惠：只需「讚好」香港百樂酒店Facebook專頁，並出示Facebook優惠券，惠顧自助晚餐，可享7折，優惠只適用於4月19日至22日，詳情請到網站查詢
 

復活節繽紛派對　大堂酒廊

大人可以喺大堂酒廊嘆住食主題下午茶自助餐，享受優雅、悠閒嘅Tea Time。仲有維港靚景配現場音樂演奏，畀你享受下生活態度！少少地食個煎迷你牛柳伴松露或者香蒜燒羊脾伴烤馬鈴薯，啱啱好。仲有橘子烤火腿搭配迷你胡蘿蔔、復活節檸檬燒雞、提拉米蘇巧克力蛋、復活節杯子蛋糕等充滿節日氣息嘅茶點。

大堂酒廊下午茶自助餐
供應日期：4月19至22日（13:00-17:00）
價錢： 成人$398/位，小童＄328/位，詳情請到網站查詢。　
 

文：Yanny