香港今年有唔少飲品店加入戰團，最新有呢個台灣原創品牌，主打每日新鮮手炒嘅黑糖珍珠，特別在奶蓋上可以加唔同Topping！其中一款仲有太極圖案，加上黑糖掛杯同得意貓咪杯蓋，當然要相機飲先。茶葉、黑糖等原材料都由台灣直送，保證啖啖寶島風味。
 

下站帖係台灣品牌，不過第一間店開喺香港尖沙咀？原來係因為品牌由一位香港人同一位台灣人共同開創，佢地想先喺香港呢個兵家必爭之地開始，嚟緊亦會喺台灣開設分店。店名國語諧音係「下戰帖」，因為兩位老闆都對自己出品非常有信心，歡迎大家嚟試下咁解。主打嘅黑糖珍珠每粒都係即日現煮，再加台灣黑糖手炒15分鐘保證入味。
 

每杯即點即製，先落黑糖漿同黑糖珍珠，加冰、明治鮮奶，再加上一層自家製奶蓋。黑糖漿同黑糖珍珠都係用天然台灣黑糖，無添加色素。想打卡嘅朋友記得把握黑糖紋明顯嘅時間呀。
 

下站帖波霸厚醇奶（$30）

最受歡迎嘅飲品，影相後要先搖勻再飲，黑糖波霸相當入味，口感軟Q而且甜味自然，加上鮮奶一暖一凍非常討喜。唯一有啲可惜嘅係雖然有加奶蓋，但奶香味無想象中咁濃。留意返黑糖珍珠系列都係固定甜度同冰量。
 

下站帖太極厚醇奶（$34）

太極嘅意思其實係花生同芝麻！喺原味奶蓋上面再加台灣運嚟嘅黑芝麻粉同台灣6號花生粉，兩種顏色令奶蓋望落有啲似太極圖案。
 

建議飲法係可以先插飲管試咗黑糖珍珠鮮奶原味，再將奶蓋上面嘅芝麻同花生搞勻。芝麻粉同花生粉香得嚟唔會太甜，搞勻後增加風味同細細碎碎嘅口感，幾有驚喜！
 

 

日出蜜香紅奶蓋（$36）

台灣老闆來自彰化人水私房班底，有多年茶飲相關經驗，新店亦特別從台灣引入六款茶葉。最推薦嘅係呢款日出蜜香紅茶，茶湯紅潤，唔洗加糖都有種花果甜香。而奶蓋唔單止加咗芝士，更喺最後灑上粉紅岩鹽，增添鹹香亦更帶出蜜香紅茶嘅甜味。建議揀少糖或者半糖，更容易品嘗到茶嘅原味。
 

霸沏爆滿鮮果（$35）

想試清新啲話當然唔少得水果茶，呢杯霸沏爆滿鮮果茶底係茉香綠茶，再加蘋果、橙、青檸、百香果醬同鳳梨醬。特別係鳳梨醬係選用台灣鳳梨，比一般香港買到嘅菠蘿酸少少，帶獨特鳳梨香味，而且纖維更多飲落更有咬口。整體飲落幾清新，可以揀半糖甚至微糖。不過因為冰都幾大粒又多水果，變咗吸管有啲難插，唔介意嘅朋友仔可以嗌少冰。
 

店名另一意思係請各位「下站」嚟試下店家嘅獨門「帖」方，新店啱啱開張所以歡迎大家畀多啲意見。舖頭雖然唔大，但黑白主調非常搶眼，一角有燈箱方便大家打卡。影相影到手機無電仲有買充電器租借站，非常貼心。
 

下站帖
地址：尖沙咀加連威老道41A-41B號興明樓地舖

文、相、片：Cathy