掃街係有條癮㗎！旺角可以話係掃街嘅集中地，唔少人都貪佢選擇多又夠集中，最近喺中心點又開咗間新嘅小食店，唔係淨係賣魚蛋燒賣咁簡單㗎，日式、港式同西式小食都有賣，仲有一啲平時喺小食店唔會見到嘅小食添～所有食物都即叫即整，而且價錢都幾抵，平時掃開街嘅可以一試！
鰻魚玉子燒($45)
玉子燒蛋漿會先加入木魚碎，然後喺中間加入鰻魚塊先卷。玉子燒控制得啱啱好，好滑溜，一切開係滿滿嘅流心蛋漿同鰻魚汁，上面灑上蟹籽同木魚碎，一啖食落去真係勁滿足啊！鍾意食玉子燒唔可以錯過！
日本一口牛(細$35/大$55)
選用嚟自日本嘅一口牛，即叫即炒，一般會炒到六至七成熟，客人仲可以自己要求熟成程度，好貼心啊～因為即炒嘅關係一口牛好香，而且夠惹味同軟腍。
黃金軟殼蟹($45)、鵝肝多士($40)
黃金軟殼蟹可以話係添有香港特色嘅小食，軟殼蟹炸得香脆，鹹蛋黃嘅味道滲透軟殼蟹，香得嚟唔會太鹹。鵝肝多士就真係抵食之選啦，喺出面食閒閒地都要七至八十蚊，但呢度四十蚊就食到啦！
藍冰菠蘿可樂($25)、芒果椰奶泡泡($25)、青蘋果飄雪($25)
小店仲有供應各式特飲同刨冰，呢杯藍冰菠蘿可樂就啱晒相機飲先啦，老闆特意由外地引入藍色可樂，貪佢夠特別！芒果椰奶泡泡椰香味濃，青蘋果飄雪解暑就一流～
地址: 旺角登打士街43H號登打士廣場地下6號舖
文、相、片: Yanica