鍾意食燒肉嘅朋友有口福啦！尖沙咀呢間新店主打日式燒肉，新開即推出期間限定嘅鳥取縣和牛Menu，畀大家唔使飛都嘆到全日本只得1%嘅優質和牛。最重要係有專人燒肉服務，每塊都幫你燒得啱啱好。仲有部自助清酒售賣機，用手機Scan QR code就可以揀心水清酒，配燒肉一流呀。
燒肉臻位於尖沙咀寶勒巷，特色之一係有專人幫可以大家燒肉，唔使再怕自己燒得太生或者太熟，每塊高級肉類都會按建議順序燒至理想熟度。餐廳亦設有熟成櫃，供應低溫熟成牛肉。不過新張期間最推介嘅，就係期間限定嘅鳥取和牛！
期間限定鳥取和牛
鳥取牛A4牛三角（$288/100g）
鳥取和牛有咩咁架勢？一方面因為鳥取縣從江戶時代就作為和牛產地，但養嘅和牛只占日本全國嘅1%，每年輸入香港嘅都唔過10隻！另一方面係鳥取和牛嘅脂肪含有大量油酸，令肉質柔軟而且入口即溶。
牛三角係牛肋當中嘅頂級部位，一隻牛先得兩塊，特色係油花細密、分佈平均。燒過後唔單止帶出油香，食落更有牛脂嘅甘甜！肉質柔嫩多汁，一試難忘。
鳥取牛A4牛胸腩（$268/100g）
牛胸腩相對起牛三角會有更多肌肉，所以口感會比較結實，加上充沛油花，喺口腔當中油香會越咬越香！牛肉香味亦更為濃郁。
全港首部清酒自動售賣機
清酒自動售賣機起源於新潟縣，當地就入硬幣方便隨時飲，而喺香港就有公司研發出呢部用手機QR Code嘅清酒自動售賣機啦。全港第一部而家就放咗喺燒肉臻，用法都好簡單，用手機Scan QR Code去到SAKE Z網上系統，然後買代幣券（$100/10個代幣），準備好酒杯再喺部機前面Scan多次買咗嘅代幣券QR Code就得啦。每杯係30mL，畀大家可以試多幾款。
鏡山 千秋龍脈（5個代幣/30mL）
清酒自動售賣機有成18款嚟自日本唔同地方嘅清酒，可以喺自動售賣機睇到精米步合、酒精濃度等基本資料，亦可以喺SAKE Z網上系統搵到詳細介紹。當中比較特別嘅有嚟自滋賀縣嘅鏡山 千秋龍脈，屬於無濾過嘅生原酒，味道爽朗淡麗，帶類似青蘋果嘅微酸，相當清新。
如果想配搭燒肉、特別係和牛嘅清酒，就推介試京姬 匠 純米大吟醸（3個代幣/30mL）同六十餘州 雄町（3個代幣/30mL），兩款都係比較Dry嘅清酒，可以中和燒肉嘅油膩感。而如果係平時比較少飲清酒嘅女士初入門，可以選擇加茂錦 純米大吟醸（4個代幣/30mL）或者東洋美人 醇道一途（4個代幣/30mL），都係帶優雅果香同米香。
更多【新店直擊】： |
招牌燒肉推介
牛肉盛合（$330）
牛魔王必點！由餐廳精選挑選出七個最受歡迎又適合燒嘅部位：鹿兒島和牛（牛三角胸小排、牛背峰、牛板腱、牛腩肉）、美國安格斯牛（牛翼板）、荷蘭牛肝，同厚切牛舌。當中最特別嘅係坊間少見嘅牛背峰，雪花紋理豐富，口感細膩柔軟。鍾意有咬口就要食牛三角胸小排，因為同筋膜相連，燒脆之後可以同時食到軟嫩同煙韌兩種口感。
蒜香牛腱薄燒（$48）
另一推介係牛腱，肉質比較結實所以有嚼勁，配搭香味濃郁嘅蒜蓉帶出肉汁香氣。重口味人士必點。
雞肉盛合（$148）
雞肉同樣有五款精選部位：日本德島阿波尾雞（柚子雞腿、雞腎、雞心）、日本一夜干雞翼，同雞胸軟骨。柚子雞腿用日本柚子汁加韓國柚子醬醃至入味，味道酸甜肉質彈牙。一夜干雞翼即係將雞翼灑上調味料後風乾一日，可以令雞肉更結實，皮脆肉嫩又帶鹹香，最啱送啤酒！
炭火雞（$98）
日本產炭火雞選用雞髀肉，先以炭火汁醃過，再用真·炭火燒香，所以上枱就聞到炭火煙燻風味。雖然黑黑哋色但食落肉質滑溜軟嫩又多汁，雞不可貌相呀。
豚肉盛合（$198）
豬肉盛合全部取自新鮮豬隻，再經過處理，就算連內臟都唔會有任何異味。精選部位包括：伊比利亞豬肋條、明太子紫蘇豚肉卷、豬大腸、豬心、豬脷。伊比利亞豬係西班牙獨有嘅黑毛豬，豬肋條油花均衡，嫩滑得嚟厚實有嚼勁。
伊比利亞梅頭（$78）
梅頭係豬嘅上肩肉，雪花紋理明顯、油花豐富最啱燒烤！而且因為無肉筋、纖維細緻，所以肉質非常軟腍，燒過後更加係入口即溶呀。
燒肉臻
地址：尖沙咀寶勒巷3-7A號萬事昌大廈1樓102號舖
文：Cathy
相、片：Tom Li