就嚟又到一年一度嘅萬聖節，入主題公園玩之前不妨睇埋開飯仔介紹今年嘅套餐同小食，包括影迷必試嘅《恐懼鬥室》主題套餐，「血腥」特飲，有氣氛又唔啱小朋友嘅兒童餐，同方便邊行邊食又夠飽肚嘅小食等。食飽咗好上路、吖唔係、係行路去鬼屋玩吖嘛。
 

《恐懼鬥室》主題套餐
 

鐘意《恐懼鬥室》嘅Fans應該會尖叫，係興奮到尖叫呀。成個套餐有哈囉喂氣氛得嚟又貼題。前菜意式蝦雲吞配黑菌忌廉汁及蕃茄汁，大廚特別將雲吞整到成個大腦咁，加埋番茄汁真係有啲「血腥」。之後嘅甜椒蕃茄湯更加係係一片「血池」旁邊擺咗Billy大頭！
 

而主菜有三款選擇，最搞鬼嘅一定係檸檬百里香海鹽焗鱸魚配白酒汁，因為海鹽特別整成Billy大頭咁，食之前要先扑開Billy大腦！
 

而另一「血腥」選擇就係鮮茄海鮮南瓜意大利飯，用甜椒同豬油網包住嚟扮人類內臟，而且食之前仲要親身將南瓜汁用針筒打落去，又係一個影相位。最後紅酒燴牛尾賣相亦係一片紅，各位食肉獸唔知會唔會因為有啲恐怖而唔敢食？
 

嚟到最後甜品環境就係以電影每次都會出現嘅「Play Me」錄音帶作為造型嘅椰子竹炭朱古力慕斯，絕對要相機食先。另外仲有恐懼鬥室特飲，兩粒生果「眼珠」下面其實係檸檬沙冰，造型搞鬼但飲落相當消暑呢。
 

供應餐廳：冰極餐廳（全日）及海龍王餐廳（11:00 - 14:30及16:30至餐廳關門）
供應日期：2017年9月15日至10月30日

巫飯極樂套餐
 

另一恐怖造型套餐之選，以巫師同煉金術做主題。前菜猛鬼斷頭台個名聽落有啲恐怖，但其實係老虎蝦沙律伴海鮮啫喱嚟。而湯就特別用高身玻璃樽裝住，令大家飲呢樽蕃茄凍湯嘅時候好似有種飲緊魔法藥水嘅感覺。
 

主菜賣相絕對會令大家「哇」一聲，因為有隻手喺墓地伸出嚟！其實呢碗瑤柱鮑魚雞粒炒飯上面係插咗隻雞腳啫。甜品煉金迷陣好有魔術Feel，乾冰白煙中嘅係黑朱古力、白朱古力、士多啤梨同芒果口味慕斯。
 

供應餐廳：海洋冰室
供應日期：2017年9月15-17，23-24及30日，10月1-2，5-8，13-15，19-22，26-29及31日

哈囉喂全日祭兒童餐
 

小朋友都想食哈囉喂套餐？當然有兒童餐供應啦！南瓜忌廉湯配蒸蛋及黑橄欖，得意又搞鬼。主菜鮮蝦橄欖蕃茄意粉配哈哈笑薯圈唔單止賣相吸引，仲配埋Kraft Heinz x 海洋公園珍藏版迷你茄汁。食埋牛油蛋糕配竹炭曲奇及卡夫棉花糖醬做甜品，滿足哂。
 

供應餐廳：冰極餐廳（全日），海龍王餐廳（11:00 - 14:30及16:30至餐廳關門），海洋冰室（全日）
供應日期：冰極餐廳及海龍王餐廳：2017年9月15日至10月31日
海洋冰室：2017年9月15-17，23-24及30日，10月1-2，5-8，13-15，19-22，26-29及31日

哈囉喂全日祭特飲
 

連飲品都好有哈囉喂特色！HW102017口福疫苗飲料（Lakeside Chill Bar供應）大大支針筒夠玩味，有紅色（薑味汽水、檸檬汁、石榴糖水）同綠色（青檸汁、雪碧、薄荷糖水）兩款選擇。想再「血腥」啲可以揀血池地獄，飲之前將針筒裡面嘅士多啤梨汁倒落綠色薄荷飲品裡面，真係幾有血池效果。
 

供應餐廳：Lakeside Chill Bar／海洋冰室
供應日期：Lakeside Chill Bar：2017年9月15日至10月31日
海洋冰室：2017年9月15-17，23-24及30日，10月1-2，5-8，13-15，19-22，26-29及31日

恐懼鬥室單點小食
 

想邊行邊食嚟醫肚嘅話，可以留意呢啲小食呀。煙火雞槌配肉醬及粟米片同黑椒牛肉漢堡配格格薯塊（動感美食坊供應）都夠大份，而小食拼盤配肉醬（海濱廣場雪糕車供應）就有兩件炸雞槌同三條辣肉腸，點埋肉醬啖啖肉最啱食肉獸啦。

供應餐廳：動感美食坊／海濱廣場雪糕車
供應日期：2017年9月15日至10月31日

文、相、片：Cathy