嚟緊復活節連埋清明連放五日假咁爽，當然要同朋友出去relax、嘆返個afternoon tea喇～唔少酒店同餐廳都襯住呢個長假期推出特色下午茶，有外賣tea set、下午茶自助餐、田園野餐風，連海鮮主題都有，真係要畀個藉口自己去享受吓。
Spring Garden春夏童夢下午茶 樂聚廊
天氣開始回暖，呢間酒店順勢推出春夏主題嘅下午茶，嚴選時令士多啤梨及意大利阿馬爾菲檸檬製成各式甜鹹點，好似經典法式甜品士多啤梨芝士蛋糕，士多啤梨嘅酸甜啱啱好中和到濃郁芝士，清新減膩。講到tea set當然唔少得英式scone，呢度嘅scone配上經典英國奶油及自家製士多啤梨大黃果醬，奶油同果醬完美平衡！如果仲係唔想外出用餐或者想更有氣氛拎去野餐食，呢個下午茶都有外攜服務，外攜盒子由俄羅斯刀畫藝術家 Anna Salenko 繪畫，滿滿春日色彩！
供應時間: 由即日至5月31日期間，每日15:00-17:30
價錢：$558二人份／$338單人份（另收加一服務費），外攜服務$502
泰式田園野餐下午茶 Lady Nara 
呢間來自泰國嘅粉紅主題餐廳本身已經啱晒打卡，配埋呢個新推出嘅田園野餐下午茶真係會影到相機無晒Memory！上枱前會預先喺客人桌面舖上紅色格仔枱布，其後放上野餐藤籃，直頭好似去咗室外野餐咁～打開野餐藍後仲驚喜，甜點最吸睛係斑蘭味鬆餅，斑蘭味突出；脆芒果糯米飯係芒果糯米飯嘅變奏版，香甜嘅泰國水仙芒配上香脆糯米飯糰，口感煙韌酥脆。鹹點方面推介迷你蝦餅粉紅漢堡，麵包加入紅菜頭汁烘焗，呈天然粉紅色，內裡夾上即炸蝦餅及粉紅沙律醬，香脆惹味。溫提得平日先供應咋～
供應時間: 即日起，逢星期一至五15:00-17:30
價錢：$398／二人份（另收加一服務費）
松露下午茶 WOOBAR
想對自己好啲，不妨試吓呢個以黑松露做主角嘅「黑鑽魅力」下午茶。酒店行政總廚Rafael Gil及糕點總廚Baptiste Villefranque分別用松露入饌創作各五款甜鹹點，夠晒矜貴！鹹點包括牛肉紅菜頭他他配松露雪花及鮮松露雞蛋三文治等，甜品就有口感酥脆嘅鮮松露士多啤梨蛋白餅，特別一提呢款松露康堤芝士馬卡龍，味道鹹鹹甜甜絕對打破大家對馬卡龍嘅印象。
供應時間: 即日起至5月31日
價錢： $538／二位（星期一至五）、$688／二位（星期六、日及公眾假期）
生蠔魚子醬下午茶 Isola Bar & Grill 
如果想有啲新鮮感，中環呢間意大利餐廳突破傳統下午茶框架，推出加入海鮮元素同多種珍貴食材嘅「藍之瑰寶」下午茶～如英式鬆餅可以配埋矜貴嘅西伯利亞魚子醬一齊食，另外有每日嚴選嘅新鮮時令生蠔、一入口係滿滿海洋鮮味！仲有特色凍肉芝士拼盤及多款鹹甜點心，鹹點部分有朱古力和牛三文治配新鮮意大利冬季黑松露同埋鵝肝配野莓醬棒棒糖及虎蝦「雞尾酒」；甜點部分包括甜而不膩嘅紅絲絨野莓蛋糕、冧酒朱古力蛋糕及以Pina Colada Cocktail概念延伸嘅菠蘿椰奶蛋糕，絕不欺場！
供應時間: 即日起，每日15:00-18:00
價錢： $388／位，兩位起
日韓主題下午茶自助餐 The Place 
至於大胃王，普普通通嘅下午茶又點夠塞飽個肚，所以食返個下午茶自助餐就最啱喇～旺角呢間酒店啱啱就將下午茶自助餐換成日韓主題，日式主題有熱辣辣即製爐端燒、串燒、大阪燒、關東煮、即製章魚小丸子及即煮日式烏冬等。至於韓式嗰邊則有人氣十足嘅街頭小食芝士熱狗棒、卡邦尼年糕、泡菜炸雞及韓式大醬湯等。各位日迷韓迷都唔好錯過！
供應時間: 逢星期六、日及公眾假期15:15-17:30
價錢： 成人$338，小童及長者$248
文: Yanica
