一年一度嘅情人節，係同愛侶浪漫一番嘅日子，揀餐廳梗係要菜式特別兼有靚景。今次推介5間可以飽覽維港景色嘅西餐廳畀大家，部分重開業無耐，啱晒鍾意試新嘢嘅情侶。
海景意大利餐廳 Sabatini
圖：餐廳（官網）
最近選址中環開設分店嘅老牌意大利餐廳，新店走高雅嘅羅馬建築設計，優雅富格調，一大片落地玻璃將維港美景盡收眼底～新店依舊呈獻正宗意大利美食，好似自家製貝殼粉配意式西西里紅蝦及香草番茄汁，貝殼粉完全吸收紅蝦嘅鮮味；而意式醃製牛肉配辣根、火箭菜同香草番茄，鹹香得嚟幾清新。
法式情懷×米芝蓮廚師 Cristal Room by Anne-Sophie Pic
浪漫嘅情人節，自不然會聯想浪漫嘅法國菜～呢間由世界著名米芝蓮三星法國女廚師首間喺香港開設嘅餐廳，上年年底開尾開業，由巴黎著名建築、室內設計工作室設計，環境相當優雅，而且可以飽覽維港景色，氣氛特別浪漫～而菜式設計亦充滿藝術感，其中燒藍龍蝦、24個月Comté蕎麥麵伴巴黎蘑菇清湯都值得一試。如果點選套餐，亦提供八道菜情人節餐單～
空中酒吧 Cardinal Point
同Cristal Room同一大廈嘅頂樓，就有景觀極度開揚嘅空中酒吧，黃昏時分嚟睇埋日落更有情調。酒單由屢獲殊榮嘅集團飲品總監設計，雞尾酒以旅遊、探索精神為創作靈感，可配搭薄餅、他他等輕食，以及經典亞洲菜餚。店內展示由著名藝術家創作嘅藝術作品，而室內、外酒吧都有駐場DJ，融合唔同嘅文化色彩。
新派亞洲法國菜 PANO
圖：如果坐露天觀景平台，可以望住180度無遮擋嘅海景，而室內則氣派舒適。餐廳將環球食材，融合法、亞風味，創作各種特色菜餚。好似蘋果木煙燻燉蛋配馬糞海膽，入口滑嫩鮮甜，連埋三文魚籽一齊食「卜卜聲」，又有微微木香，層次豐富。餐牌方面包括午餐、下午茶同晚餐，唔同時段嚟慶祝情人節都冇問題。
扒房×Fine Dining Harlan's 
圖：sikbaobaola、餐廳（FB）
呢間人氣高嘅西餐廳，以藍、白色做主調，而且樓底高，大部分座位都可以欣賞維港景色，平台戶外雅座嘅視野更加無遮無擋，氣氛一流～今年情人節推出嘅「愛的宣言」六道菜法式晚餐，以多款由法國直送抵港嘅矜貴食材，炮製法國白珍珠蠔配蜆肉清湯、法國血鴨胸、法國龍蝦配慢煮豬腩肉配蘑菇醬等精緻菜餚。
文：Cathy
