雖然話飛台灣一轉唔洗幾耐，不過無理由個個禮拜都飛嘅。想同男朋友或者好姐妹搵間台式餐廳或者Cafe，嘢食啱口味之餘又唔會坐得唔舒服？開飯仔幫大家揀咗以下推介，有新開用心小店，有台灣人主理道地台菜，遍佈港九新界總有一間啱你。
台灣人主理心機小店 六両三
圖：mckey
尖沙咀新開台菜館，老闆唔單止係台灣人，而且為咗開呢間店特別返台灣拜師學藝兩個月。而且用料亦非常認真，牛肉麵湯底用足10斤牛筒骨熬至少30小時，唔洗落任何味精或者牛骨粉，連麵條都係特別請香港麵廠按要求製作。餐廳以Open Kitchen配木枱櫈，唔會太逼夾又有啲台灣夜市Feel。
人氣台灣菜觀塘分店 阿元來了
圖：xxslws
另一間又台灣人主理嘅小店，西營盤店細細間成日都要限時30分鐘傾唔到計，幸好後來係觀塘再開分店。空間大咗之餘，仲將更多老台灣嘅元素帶到裝修裡面，最啱自拍。而食物推介當然唔少得招牌魯肉飯同香口鹽酥雞。而且餐廳不定期推出新菜單，想試冷門嘅台灣傳統小菜，不妨多啲留意！
中環文青Feel Cafe 喵一下
想再坐得舒服啲，可以考慮位於中環元創方嘅呢間台日懷舊書店Cafe，裝修擺設全部都有心思，連餐具都有唔少係貓咪造型！Menu以台式套餐為主，滿漢紅燒牛肉麵有三種食法，可以自由選擇湯底濃淡度。另外仲有烘蛋、刈包、鹽水雞同蔥餡餅等，無論係當前菜或者送酒小食都啱。
旺角都有台灣老街風味 老街
旺角係最方便嘅聚腳點之一，而旺角區最受歡迎嘅台灣菜館一定要數到呢間，懷舊主題加上卡位。雖然繁忙時間會限時而且略嫌坐得比較逼夾，不過勝在夠抵食！招牌牛肉湯麵系列全部大大碗，湯底帶蘿蔔清甜唔死鹹。小食方面就有滷味切豬耳、魚酥皮蛋豆腐、小香腸拼鹽酥雞等推介。
古早味台灣街頭小食 龍鳳號
古早味意指令人懷念嘅傳統味道，亦係觀塘呢間新開嘅台灣菜館嘅主題。招牌魯肉飯同肉燥飯各有粉絲，前者帶陣陣豬肉油脂香，後者肉碎較多更有咬口。另一推介係招牌黑白切，有六款豬內臟任揀，當然亦可以直接嗌份綜合試哂咁多款。裝修有啲似古代客棧，木枱櫈加紅磚牆，加上店名霓虹燈，有懷舊Feel而唔老土。
新界新派台灣菜 九份•十分
圖：花太郎
上面咁多間都以九龍區為主，終於有間喺新界區，仲要喺沙田同天水圍都有分店。餐廳走新派台灣菜風格，好似台灣鹽酥雞就有成六支調味粉畀大家自己調校鍾意嘅口味，亦會有奶酥吐司同冰淇淋鬆餅等甜品。加上Menu選擇多元化，沙律、三文治、手作麵、泡飯等，連飲品都有齊水果茶同珍珠奶茶等熱門選擇，保證搵到心頭好。
港島台式Fusion菜 屋喔
同樣賣新派台灣菜，呢間分店就位於中環同銅鑼灣。望落似西餐廳多國台灣菜館，皆因呢度主打洋風台式Fusion菜，舉個例子，唔少人推介嘅黑松露蚵仔燉飯就係西式黑松露燉飯同台式蚵仔泡飯嘅Mix & Match版。如果想試返一般台灣菜，亦有鹽酥雞肉燥飯、古早味牛肉湯麵等選擇嘅。
抵食多選擇Lunch Set 饕鍋物
呢間銅鑼灣同將軍澳都有分店嘅台式火鍋，晚市半放題都幾高CP值，不夠今次開飯仔推介嘅係佢地嘅台式午市套餐。有香港人見慣見熟嘅紅燒牛肉麵、台式香腸肉燥飯，亦有比較少見嘅溫泉蛋鮮蝦擔仔麵同蠔仔三絲炒新竹米粉，最緊要係包前菜同一杯熱飲，價錢都係$45-$62，以銅鑼灣區嚟講算幾抵食。
更多【二人前指南】： |
文：Cathy