花膠口感軟滑又養顏，係唔少女士嘅最愛，最近屯門就有間懷舊主題餐廳以花膠做主打，湯底用鮮雞同南非花膠熬超過10小時。午市主打花膠飯麵，晚市就變成花膠雞湯鍋打邊爐！火鍋最平$200樓下就可以任飲任食兩個鐘啦。
 

屯門新開嘅火水爐花膠館其實係旺角火水爐冰室火鍋嘅分店，睇名大家應該都估到主打花膠菜式，不變嘅係裝修同樣以懷舊戲院為主題，門口係復古手繪油畫風電影海報，裡面有八九十年代經典電影名霓虹燈管，加上火水爐裝飾、綠白色紙皮石地磚，播埋粵語金曲，成個Feel真係好復古！
 

午市歎花膠飯麵

湯底用原隻新鮮雞配南非花膠，每晚熬至少10個鐘到隔日，無添加味精，啖啖鮮、香、濃、甜。麵亦係自家製，麵條爽口彈牙，比坊間一般生麵少鹼水味。
 

配料嘅花膠就嚟自美洲加勒比海天然深海，食落重膠質，含豐富膠原蛋白，有滋陰養顏功效。而且厚度適中，口感爽滑彈牙。
 

男士們如果怕麵食唔夠飽，呢度亦有花膠飯供應，花膠用鮑魚汁炆過，增添香味，而且夠厚身唔會過腍。配料亦有水準，雞髀肉嫩滑，花菇爽腍入味。
 

除咗粥粉麵飯之外，亦有香口小食可以同朋友Share食，例如呢份比較少見嘅炸豬手，南乳香味十足，加上炸得夠鬆脆，豬皮外脆內彈，豬肉亦相當香口。
 

 
晚市任食火鍋

晚市火鍋繼續有得食花膠！有濃厚花膠雞湯鍋同麻辣花膠雞煲兩款口味選擇，而呢個套餐就已經包當中一款湯/鍋、餐前小食、懷舊甜品，而超過60款火鍋配料同汽水就120分鐘任食任飲！開飯仔就揀咗濃厚花膠雞湯鍋，雞湯香味加上花膠膠質真係無得輸，打邊爐之前記得飲返碗！
 

可以任食嘅包括特級安格斯牛肉、美國珍寶肥牛、黑毛豬肉片、特色丸子、手包雲吞水餃、脆炸響鈴、炸魚皮、水魷、蔬菜、麵類等等。唔好以為選擇咁多加上放題水準就一般，特級安格斯牛肉牛香濃郁口感軟嫩，肥牛片唔會得雪花食落又無渣，最驚喜嘅係黑毛豬肉片，柔滑帶甜味！

想再豪啲嘅，可以選擇$258/位（21:00後優惠價$228）嘅安格斯海鮮火鍋套餐，包埋時令海鮮拼盤同自選湯底；牛魔王就可以再升呢至298/位（21:00後優惠價$228）嘅牛小排海鮮火鍋套餐，就可以任食埋頂級牛小排啦。
 

火水爐花膠館
地址：屯門屯隆街2號屯門時代廣場北翼地下35-38號舖

文、相、片：Cathy