喺香港捐窿捐罅會搵到唔少美食，重可以順便同靚景打卡。今次介紹嘅2間中菜館都滿足到呢兩點，當中嘅海鮮同肉食菜式都高質又足料，而且一間融入現代或西式烹調手法，一間係鑊氣十足嘅港式風味。

金鷺湖 （大埔）

呢間餐廳喺大埔一棟歐陸式建築內，令人感覺一秒去咗外地旅行咁，加上望住湖景食高質中菜同點心，令人感覺更relax。師傅為咗畀大家多啲新鮮感，無論烹調方式定選料都落咗唔少心思，當中海味同海鮮菜式嘅選擇亦比較多。

流心鵪鶉蛋燒賣

呢款燒賣一上檯就睇得出比平時大好多，因為鵪鶉蛋冇放喺面，而係成粒釀入去。記得上檯2分鐘內就好食喇，以防鵪鶉蛋過熟冇咗流心效果。加上爽口又切到大大粒嘅越南蝦肉，口感夠晒彈牙。

明太子釀蟹蓋

鍾意啖啖蟹肉又想食得優雅啲，呢道釀蟹蓋就啱你喇。每個蟹蓋用100g蟹肉做餡料，差唔多有1隻蟹嘅分量；另外加入日本明太子提鮮，再撈埋洋蔥絲同牛油忌廉，食落鹹香爽口又juciy。

花枝釀遼蔘

想帶出日本關東遼蔘彈滑厚肉嘅質感，起碼要浸發一星期，而呢道菜更特別配法式龍蝦湯，用龍蝦殼、西芹、紅蘿蔔等食材熬煮8個鐘，絕對係一道心機菜。另外，遼蔘釀入墨魚膠唔只令鮮味同彈牙嘅口感更出眾，亦令色彩分明得多。

酸辣金湯飛驒A5和牛片

食完海鮮想有啲肉落肚嘅話，不妨試呢味高質嘅中日Fusion菜。參考火鍋嘅概念，將味道濃郁嘅A5飛驒和牛片擺到好似西餐咁精緻，再用熱湯淥一淥就食得。金黃色嘅湯汁用煲中式湯嘅方法慢慢熬煮，將南瓜、薯仔、燈籠椒辣醬、酸蘿蔔等材料嘅味道逼出嚟，酸辣味道都幾刺激味蕾；撈埋日本雞蛋蛋汁，肉片更加香滑。

金鷺千層紅燒肉

如果想試傳統口味，金鷺千層紅燒肉係唔錯嘅選擇。每份用1斤本地黑毛豬製成，做完前期處理就以紅燒汁煲3個鐘，好似煮東坡肉咁，入口即融富油香，肉質軟腍入味，送飯啱晒。

新多寶來海鮮酒家 （流浮山）

流浮山海旁係本土特色打卡熱點，一場入到嚟梗係食埋海鮮餐啦！呢間海鮮酒家畀你喺魚缸挑選生猛活海產，另有供應中式小菜，配套餐或單點都得。

鮑魚炆雞腳

鮑汁炆雞腳食得多，呢度就有豪華版，落埋原隻鮑魚！鮑魚同鮑汁本身已經花時間製作，再將雞腳炆到軟腍入味富膠質就更需要耐性，所以呢味唔係恆常菜式，要預訂先食到。

酥炸生蠔

蠔係流浮山不可不食嘅菜式之一，酥炸方法使台山蠔外層酥脆，內裡嫩滑juicy，口感層次分明，配埋生菜一齊食可以減輕油膩感。雖然就咁食鮮甜啲，但蘸沙律醬會比較惹味，好啱做前菜小食或下酒菜。

豉油王海蝦

海蝦嘅肉質比較爽口彈牙，但平時喺街市買嘅點都冇喺流浮山食嘅咁新鮮。海蝦用港式風味嘅「豉油王」方法炒製，火候十足，令蝦身沾滿鹹香嘅味道，非常惹味；加上蔥花一齊炒，吸埋海蝦流出嘅精華，食落更加鮮香。

油鹽焗奄仔蟹

有蝦有蟹自然滿足得多！平時喺屋企煮蟹多數蒸同炒，喺酒家就試唔同口味啦。奄仔蟹本身多膏肉甜，用牛油同鹽焗製，等蟹肉慢慢吸味，既可以保持嫩滑，又令鮮味同香氣更突出，而且口味亦算比較清。

脆皮煲仔鮑魚雞粒炒飯

海鮮始終易啲消化好快會餓，叫個飯就可以增加飽腹感喇。脆皮煲仔鮑魚雞粒炒飯特別用熱辣辣煲仔上菜，令炒飯喺煲內加熱形成飯焦。如果一上菜就撈飯，飯焦會少啲同濕潤啲，放耐少少就比較脆口。

心動不如行動！有興趣就快啲約埋三五知己去嘆下美食！快啲bookmark定啦！    

*以上圖片只供參考，所有食品以實物為準. 食品供應因餐廳而異