望穿秋水終於等到天氣轉涼，又係時候食暖笠笠嘅火鍋喇！火鍋店真係越開越多，今次揀咗幾間特色新店介紹俾大家，有近排好hit嘅麻辣火鍋、最多人鍾意嘅粥底海鮮鍋、有得燒烤嘅燉湯火鍋同埋創意放題，睇睇啱唔啱口味？
國內十大名店 漲格重慶老火鍋
呢間火鍋店來自重慶，在國內有40間分店，曾獲選全國十佳火鍋店，牛油有熊仔或者麻雀（打牌嗰隻）造型，以香料、辣椒及花椒製成，每日限量製作，放入湯中加熱慢慢融化，又殘忍又可愛。湯底以多款辣椒及香料炒成，辛香有層次。配料有卷住泡椒嘅串串牛肉、黑栢葉、牛魔王拼盤及炸響鈴等。
圖：抵食海鮮粥底鍋 有米鍋粥底海鮮火鍋
呢間主打近年興起嘅粥底海鮮鍋，方健儀都介紹過。先以稀粥水烚海鮮，套餐有新鮮蝦、蟹、貴妃蚌、鮑魚仔、花甲等7款時令海鮮，然後自選5款配料，必吃花膠仔同魚腐，最後加入南瓜、芋頭、菜甫同豬油渣煮粥，海鮮新鮮，好似蟹膏夠多，煮落粥底超鮮甜，現時開業優惠都係$198/位，仲免加一好抵食！
圖：打邊爐兼燒烤 御龍軒
呢間價位稍高，但係一張枱有齊火鍋電磁爐同電子烤爐，一款配料鍾意燒又得烚又得，一料兩食。燉湯湯底有杏汁白肺、花膠海上鮮、姬松茸螺頭雞湯等，可以飲完老火湯先打邊爐，鍾意辣嘅就必試辣汁雜菌花甲鍋同香辣蟹乾鍋。配料有新鮮海鮮、厚切1++韓牛等靚貨，燒同淥都唔錯，網上訂座仲有8折優惠。
圖：冬菇亭創意放題 鱻潮手工私房鍋
位於沙田冬菇亭，湯底同配料都好有新意，好似以龍蝦、龍躉魚、手打蛋白配鲜魚湯嘅以龍會友湯底，台式墨魚腸上配墨魚滑及蟹子嘅黑白墨魚磚等，最多人食嘅鱻潮招牌鍋就係四川麻辣配鮮魚湯，用新鮮魚煲3個鐘而成。分$198及$248兩款半放題套餐，前菜、海鮮、肉類同特色配料按人頭計，另有30款配料就係任食，啱晒大胃王。
圖：文：Perrins