尖沙咀呢間外賣店係唔少附近上班一族嘅心頭好，店主將細細個食開婆婆煮嘅台灣料理，好似肉燥飯、腌青瓜等變成一份份台式便當同小食，配多杯店主自己研發配方嘅水果茶，感覺真係幾似返左台灣咁。
 

三喜家由Shanti主理，媽媽係台灣人，婆婆更加喺台北基隆做左幾十年廚師，所以新店出品主要都係跟返婆婆嘅食譜，係台灣嘅古早味，同時亦係Shanti回憶中嘅味道。
 

小時候鹽酥雞便當（$42）

台灣有唔少款式嘅火車便當，Shanti就揀左自己最鍾意嘅四款。好似呢份就有齊惹味嘅肉燥同香口嘅鹽酥雞，肉澡沿用Shanti婆婆嘅配方，由自己用紅蔥頭炸油蔥酥，到選用台灣醬油去熬煮肉燥，都係為咗保留細細個食到嘅台灣風味。肉燥就咁食會覺得偏鹹，但撈埋珍珠米煮出嚟嘅飯就啱啱好。鹽酥雞亦唔會太鹹太乾，同樣好啱撈飯食。
 

三喜古早爌肉便當（$45）

爌肉同樣係台灣古早味代表之一，用五花腩鹵製，亮點係會配一小份醋，原來係Shanti爸爸嘅秘密配方，加咗香草既醋會更清新。爌肉食落非常軟腍，豬皮有膠質口感，中間嘅肥肉入口即溶，瘦肉亦唔會過柴，點醋食就更進一步去除肥膩感。旁邊以婆婆古早配方腌製嘅青瓜亦可以中和膩度。
 

檔口一格格擺滿鹽酥小食，原來係因為Shanti細個放學後，公公會揸電單車帶佢去食小食。新店就特別仿照當時嘅台灣小食檔，擺滿唔同食材，想食咩就夾然後即叫即炸。
 

三喜皇牌鹽酥拼盤（$48）

唔單止椒鹽粉，呢份鹽酥拼盤裡面嘅麻糬波波、地瓜條、花支丸都係台灣入口。最特別嘅係麻糬波波，有地瓜同紫薯兩款口味任揀，用麻糬包住地瓜或者紫薯蓉，外面香脆煙韌，裡面係香甜柔滑。花枝丸食到裡面有一粒粒花枝肉，夠彈牙。豬肉春卷配青瓜，香口唔膩。鹽酥雞亦有水準，地瓜條同四季豆都夠惹味，不過可以再炸得乾身啲。
 

 

大滿足刈包（$35）

刈包即係以前台灣嘅漢堡包，而Shanti就選擇用炸雞髀肉嚟做主角，配台灣入口嘅包、自家研發嘅醬汁同青瓜。雞髀肉先腌好，即叫即生炸，外脆內嫩而且仲保留到肉汁。而椒麻醬汁亦相當惹味，而且仲多咗一陣酸味令個包感覺無咁膩，原來係Shanti誤打誤撞咁加咗魚露，發現效果唔錯就保留落嚟。
 

清心水果茶（$30）

食台灣菜又點少得一杯台式飲品呢？呢度同樣有水果茶，但同坊間多數以百香果配搭綠茶唔同，呢度用紅桑子果肉配四季春茶底，飲落有啲咬口，而且喺水果既酸甜味之後有四季春嘅茶香餘韻，清新怡人。
 

冬瓜鮮奶茶（$26）

而冬瓜鮮奶茶就係另一個古早味代表，用台灣冬瓜糖磚熬成冬瓜茶，再加入鮮奶形成天然漸層賣相。牛奶同冬瓜茶既比例唔錯，飲到冬瓜糖既甜味同時口感又夠滑。想清新啲嘅話亦可以揀冬瓜檸檬茶（$23），係用冬瓜茶配鮮榨檸檬汁呀！
 

三喜家
地址：尖沙咀加連威老道52至52A號地下C舖

文、相、片：Cathy