睇嚟咁多位抹茶控，新一年話要減肥嘅目標將會話咁快又可以宣告失敗，科科。因為抹茶巿場將會繼續橫行2018年，打頭陣嘅就有東涌酒店嘅「抹茶及綠茶週末下午茶自助餐」，嚟緊今個星期六開始，供應多款抹茶、綠茶嘅鹹甜品，完全就係綠色嘅世界！

先睇甜品。首推嘅係蜂蜜柚子綠茶啫喱，呢個幾有驚喜，嗶下嗶下，又真係會嗶到一條條嘅柚子肉。微甜嘅綠茶味，配埋酸咪咪嘅柚子，幾清新，拎多幾杯都食得落。

抹茶意大利芝士蛋糕（Matchamisu），睇個名就知係tiramisu嘅變奏。餐廳以Oreo代替平時用開嘅手指餅，係幾脆口嘅，不過oreo層略嫌厚咗少少，唔小心搶咗啲抹茶味，但抹茶cheesecake層係幾軟滑嘅。

抹茶閃電泡芙、綠茶奶凍、日式綠茶忌廉卷蛋等嘅甜度都適中，加上精緻的式，都係可以encore嘅系列。

至於抹茶芝士撻、綠茶芝士蛋糕同綠茶cupcake相對嚟講就比較heavy喇。同埋留意返，抹茶芝士撻嘅抹茶，係講緊面頭啲抹茶粉，中間個餡依然都係芝士嚟。至於綠茶cupcake，無論係面頭嘅綠茶cream定係底層嘅朱古力蛋糕，都偏甜，應該係甜魔專屬。

其餘抹茶甜品仲有班戟、抹茶朱古力噴泉、雪糕之類，而鹹點嘅選擇都唔少呀。以綠茶為主材料嘅蕎麥冷麵，配埋鮮蝦同蟹子製出嘅鮮蝦綠茶冷麵算係幾清淡。

想要脆口少少嘅，有綠茶香酥排骨同酥炸綠茶芝士雞扒，兩款層外皮都炸得幾脆。唔好睇少淨係得面層嘅抹茶粉，排骨又好雞扒又好，都伴隨住淡淡甘澀嘅綠茶味。

詳情
抹茶及綠茶週末下午茶自助餐
期間限定：1月13日 – 4月15日（逢星期六、日及公眾假期）
時間：2:45pm – 5:00pm

Essence
地址：東涌文東路51號諾富特東薈城酒店大堂

文、相：Kar