鍾意掃街嘅人類，當然係去到邊，掃到邊啦！今次就帶大家掃到過大海先！話說澳門漁人碼頭最近有個燈光夜巿，夾夾埋埋都有幾十個攤檔，燒海鮮、甜品、小食、特飲等等通通都有得食~ 即刻巡個圈先~

鹹蛋雞蛋仔  澤賢記

鹹蛋黃應該係今年最紅嘅食材！呢檔雞蛋仔有鹹蛋味呀，即叫即整，睇住店員真係格格都放啲鹹蛋落去㗎！所以整出嚟粒粒雞蛋仔都食到鹹蛋，係就係油就啲啲，肥咗啲啲，但堅係香口，一粒一粒好快搣下食下就冇晒。

芝士章魚燒

平時朱古力噴泉就見得多，呢檔竟然有個芝士噴泉呀！見到都覺得吸引！原來係賣章魚燒嘅，可以揀燒汁味或者芝士味，咁梗係揀芝士啦~ 啲芝士汁係店主自家調製嘅，不過有啲啲可惜，唔係想像咁將一粒粒章魚燒當棉花糖咁隊入噴泉度，而只係用匙嗶啲芝士汁出嚟淋喺面。食落都香芝士味嘅，章魚燒亦唔會話太粉，都值得一試。

黃金燒松葉蟹蓋   盛之沢山

另一樣好吸引嘅嘢就係燒海鮮喇，松葉蟹蓋呀、龍蝦呀等等全部都舖滿芝士咁燒，我都唔想用邪惡去形容㗎……但燒到啲芝士變咗半溶狀態，熱熱地咁食，well~

啤啤熊特濃牛乳軟雪糕  澳義

見到有雪糕唔係唔食呀嘛，仲要係咁cute cute嘅熊仔頭！嗯，用嚟打卡的確係一流嘅，但要快手，溶得都快呀。同埋，佢個名冇呃你，特濃牛乳軟雪糕，真心特濃，但同時都偏甜，有啲似細個食嘅白兔糖味，但就唔多夠滑。至於個熊仔頭，都ok脆口，有少少蛋香味咁。

豬腳薑、花膠響螺翅湯   裕華明記美食

估佢唔到呢個夜巿，竟然有啲滋潤嘅嘢食！例如好似有養顏桃膠雪耳糖水、花膠響螺翅湯，都幾足料。仲要連豬腳薑都有啊！

鮮味長腳蟹花膠雲吞   御品屋

見到呢個名，初初以為係啲雲吞皮包住啲蟹肉同花膠咁過癮？點知少年我真係太年輕，原來係普通正常嘅豬肉餡雲吞，只不過係用花膠湯底上，同埋有幾撮長腳蟹肉喺面頭咁。但平心而論，湯底係甜嘅，雲吞皮薄餡多。

櫻花漬青檸梳打    I’s Tea

食咗咁多嘢，當然都要搵返啲嘢飲。行靚靚呃like路線嘅朋友，首選應該係呢杯櫻花漬青檸梳打喇！面頭放有櫻花漬㗎，飲落係小清新啲friend。

德國清酒   澳門佳酒

當然，酒鬼可以啤啤佢啦。行勻全場，都有幾檔賣酒嘅，但就以呢檔最為推介。事關佢哋酒款最多，亦最為少見。其中德國嘅呢兩隻啤酒——清啤同小麥啤喺坊間都較為少見，但質素唔錯，清清地，更能突出麥味。另外有其他葡國酒選擇。

澳門漁人碼頭燈光夜巿 詳情
地點︰澳門漁人碼頭（戶外活動區）
日期︰即日 至  5月13日（逢週五、六、日）
時間︰週五︰17:30 - 22:30；週六及週日︰17:00 – 22:30
備註：場內係電子消費嘅，可以用澳門通卡（現場即買便可）、MacauPay或者支付寶畀錢

文：Kar
相：Kar、Cathy