今年絕對可以話係漢堡年，由年頭開始已經陸續有唔少本地或者過江龍嘅漢堡店開張，嚟到12月，都仲繼續有新舖登陸。今次係嚟自摩納哥嘅漢堡店，係亞洲第一間分店嚟。

新店開喺九龍灣，買過隔籬戲院食都得。暫時有近10款漢堡選擇：經典、阿根廷香料、墨西哥辣椒、松露、香脆雞肉，仲有為素食者而設嘅素漢堡，同埋香港限定嘅藍芝士漢堡。全部材料都係由摩納哥直送，開店前仲有當地大廚過嚟同員工做特訓，希望盡量做到同本店一樣嘅味道。

就咁睇好似同普通burger冇咩分別，但其實內有乾坤。啲漢堡扒係用法國草飼牛製，而且仲將洋蔥等各樣食材，一早已經混入咗落塊扒度，所以每個漢堡中間唔會太多料太厚，食起上嚟冇咁易跌料。至於個包，就係用軟身啲嘅包款，微溫，牛油味幾香。自問細食嘅朋友可以揀Single，即係一塊扒，而大胃王呢就揀double，兩塊扒啦~~~

每款漢堡用嘅醬料都唔同，全部專屬配襯過，另外可以再加配料，例如芝士、煙肉、蘑菇等，鍾意食辣嘅記得叫墨西哥辣椒。例如墨西哥辣椒漢堡個sauce，忌廉、醃小黃瓜、紅蔥、墨西哥辣椒、芥末同香草去製，就咁本身食就唔太辣嘅，但加埋辣椒喺面就會好刺激。而松露漢堡無論係塊扒定係啲醬，都有好香松露味。每個包都係即叫叫做嘅，要畀啲耐性等下。

食漢堡當然要有薯條，呢度嘅薯條個朵好勁，叫sexy fries！有幾sexy？自己feel下啦，條條都有蘸有粟米㗎，食起上嚟都有微微嘅粟米香。

另外仲有炸雞塊、羽衣甘藍沙律，同cheesecake等小食及輕食。

飲品方面，暫時就有汽水同果汁等，遲下仲會有cocktail，同on tap嘅啤酒呀預告定。

Grubers
地址：九龍灣偉業街33號德福花園平台P21號
預計開業日期：12月7日

文、相：Kar