文華海南雞飯可以話係新加坡嘅國菜之一，繼尖沙咀開咗分店之後，而家港島區嘅朋友仔都可以好方便就食到喇！今次呢個新品牌，除咗有海南雞飯食之外，仲有多款新店限定，首次引入香港嘅新加坡特色麵食、粥品同甜品等。

餐廳主打多款獨家新加坡美食，本身尖咀店嘅menu菜式固之然會有，另外仲有唔少係得呢間舖先有得食嘅限定！好似乾撈麵咁，選用馬來西亞人氣Kolo Mee乾撈麵，非油炸又冇加防腐劑，感覺好似健康啲。呢隻乾撈麵本身口感較爽，師傅混入自家秘製嘅雞肉醬汁，令麵條帶有微微鹹香。兩款乾撈分別配炸豬扒同海鮮。不過出奇地兩款嘅口味食落都較為淡身，師傅解釋話因為知道香港人唔好太重口味，所以喺調味上係刻意調輕咗。

另一款當店限定更係必食推介——椰子雪糕咖央三文治！話說雪糕三文治係新加坡一種常見嘅街頭美食，師傅取其精髓，再加埋咖央餡喺烘過嘅三文治中間，而椰子雪糕更係自家以真‧椰子肉製作，食落會有啖啖椰絲，外脆內甜，冷熱交融，係幾有驚喜。

肉骨茶係充滿東南亞風味嘅美食，又點少得呢？呢度嘅肉骨茶湯底，加入白胡椒同蒜頭熬製，胡椒辣香味突出，而藥材味較輕。飲落甜甜地，仲有麵線搭配。

招牌文華海南雞飯就唔使多介紹啦，雞肉慢煮50分鐘，口感嫩滑。

飲品方面亦有新作，呢杯有靚靚玫瑰花瓣喺面嘅，係以新鮮椰子水、鮮奶同玫瑰糖漿調製而成，攪勻飲啖啖清甜，椰味甚香。不過係order嗰陣，叫個名有少少老尷囉，杯嘢叫「玫塊我愛你」，嗯。

Chatterbox Express
地址: 太古太古城建安閣地下G515號舖

文、相、片：Kar