香港最近一連開咗幾間浜燒店，其中一間都真係幾接近「浜燒」嘅原意——將啱啱捕獲嘅活海產，圍爐即燒即食，事關呢間座落喺鯉魚門嘅浜燒店，首先佔盡地利，喺正海邊，有個無敵海景對住嚟食海鮮，然後再每朝都會喺泊岸嘅漁船度揀活海鮮，存放喺店內嘅魚缸度，客人即叫即劏。
海鮮嘅種類有超過20種，主要係嚟自日本嘅，例如帆立貝、生蠔、白蜆、蝦、蟹等等，其中，生蠔更加係直接同日本養殖場合作取貨，非常新鮮；另外亦有部分由本灣捕獲嘅螺、火箭魷之類，全部養喺魚缸度，客人可以自己揀海鮮。
揀完之後當然就係等食啦。每張枱都會有個烤爐，想自己燒又得，請店員幫手燒又得。由於海鮮都好新鮮嘅關係，基本上係唔需要用到任何嘅調味料，全部都係就咁原隻燒，原隻食，咁先可以食到佢哋最真嘅味道。特別係生蠔同帆立貝，完全係XL size，肥美到呢，同埋出面好少可唔落蒜蓉唔落牛油。呢度仲要原隻連殼咁燒，鎖返住啲汁喺入面，日本生蠔海水味唔係特別濃，但隻蠔本身就好鮮甜。帆立貝肉好嫩，生熟度剛好，裙邊更加燒到脆脆地咁，幾好。
而呢鍋浸住清酒嘅馬刀貝，成鍋擺上個爐度燒，酒味好香濃，但酒精就會散發咗，食多幾嚿都唔怕醉呀。每隻都係大大隻，爽口，有酒香之餘亦食到佢本身嘅鮮味。
另外，鍾意食魚嘅朋友，可以試埋一夜干呀。餐廳會喺每朝嘅漁船收穫中揀最適合做一夜干嘅魚種，劏魚、清除內臟、洗乾淨之後再浸泡喺同海水濃度相似嘅鹽水度，經風乾後製成一夜干。呢條係馬友魚，魚皮燒到脆卜卜，魚肉亦有彈性，鹽香剛好，最緊要係冇晒腥味呀。
最後一站式咁喺度食埋甜品啦，富士山飛雪介紹返。其實即係類似刨冰啲friend嚟嘅，但個冰底係自家製，預先混入咗啲生果好似士多啤梨、菠蘿、或者奇異果片落冰塊度，再用特地訂返嚟嘅機器攪碎，喺面舖上鮮果同北海道芝士蛋糕，賣相、味道同樣出色。
餐牌上仲有好多嘢食呀：
日本漬物拼盤
特上刺身拼盤
印尼龍蝦鳥冬
三家村水產
地址：油塘鯉魚門崇信街三家村渡輪碼頭東翼
文、相：Kar