今年真係好多過江龍餐廳，啱啱又過左一間。呢間係嚟自日本嘅班戟店，可能就咁聽個名有少少陌生，但其實係時裝品牌JOURNAL STANDARD開設嘅餐飲店，旗下仲包括咗另一人氣班戟店Flipper’s添~ 所以，部分Flipper’s班戟呢度都有得食㗎。

新店開喺九龍塘又一城，主打班戟同漢堡，不過呢度嘅班戟就唔係Flipper’s嗰隻疏乎厘口感，而係薄薄der一塊。全部都係用日本國產雞蛋同麵粉所製，有甜有鹹嘅款式選擇。最經典最人氣嘅當然係法式焦糖班戟，口感鬆軟，傳出陣陣蛋香，on top除咗有士多啤梨、香蕉同藍莓外，仲有脆脆嘅一層焦糖，啖啖都脆卜卜又甜甜地咁。

想要小清新感覺嘅可以揀檸檬芝士班戟，有粒粒自家製風乾檸檬片，微酸，仲有啲咬口，食晒三件都唔會覺得太膩。

餐牌上選擇仲有好多，例如藍莓忌廉、朱古力香蕉、士多啤梨吉士雪糕……但講到特別嘅，一定係印度烤雞呢款啦~ 仲要配咖喱汁喎。平時食印度咖喱烤雞都係夾印度薄餅，估唔到原來配班戟都得？係幾突破盲腸嘅，個汁幾香，不過開飯仔建議，都係轉返配飯嘅選擇比較好，科科。

另一款都好破格嘅班戟係期間限定嘅原隻龍蝦班戟，香港店仲係率先登場添。用原隻美國緬因州龍蝦，一嚿嚿爽彈嫩滑嘅龍蝦肉舖滿晒喺班戟面，仲有自家製嘅龍蝦汁，未食都聞到香味。同埋冇諗過龍蝦同pancake都可以做到好朋友，佢哋一齊冇乜違和感，反而係暗藏喺兩者中間嘅南瓜蓉就有少少第三者嘅感覺。

鍾意食疏乎厘班戟多啲嘅朋友，可以揀Flipper’s 嘅班戟，人氣士多啤梨藍莓香蕉班戟呢度都有，仲有舊年曾出過嘅奇跡の栗子班戟都返返嚟，栗子忌廉固然香滑兼有淡淡栗子香，但側跟粒粒栗子都唔可以miss咗呀，日本愛媛縣嘅糖煮栗子嚟，份外香甜。

Btw，舖頭唔係淨得班戟食㗎，仲有漢堡、意粉等等。呢個煙肉蛋漢堡，高度有返咁上下，好足料。用嘅係美國頂級安格斯牛肩肉，手打牛肉嚟，肉質鮮嫩；洋蔥仲可以揀轉做香港度先有嘅獨家秘製焦糖洋蔥。

 明太子醬海膽意粉

J.S. FOODIES
地址：九龍塘達之路80號又一城LG2樓30號舖i.t blue block

文、相、片：Kar