日式燒肉係好食，但價錢唔平，想食稍為靚少少嘅牛肉，起碼五六百蚊埋單。呢間來自日本嘅牛繁，於1968年創立，喺日本有百幾間分店，繼越南、上海之後，喺香港開設第140間分店！舖頭以平民抵食為宗旨，即刻睇睇性價比如何先！
香港店開喺尖沙咀，舖頭唔算大，最特別係日本煤氣爐，唔同一般圓形網燒烤爐，呢款爐細細地不過火力都好猛，而且睇到有明火，燒起上嚟特別香！好彩每個爐上面有煙囪，抽氣都做得唔錯。
餐牌同日本店大約六成相似，牛肉來自美國、澳洲及日本，招牌好似厚切牛舌、元氣牛五花等都有齊，睇落散叫價錢唔算特別平，但份量比起一般燒肉店大，而且拼盤亦會抵得多！牛繁三點盛合有齊上級牛五花、特上胸腹肉、中落牛肋肉共九塊，賣$238係抵嘅。呢度亦比日本店更多靚肉，牛繁豪華盛合有特上和牛肉眼扒、特上厚切牛舌、極上霜降和牛肩翼板扒、特上牛五花及特上胸腹肉，選用澳洲和牛，只售$688，兩個甚至三個人食都夠。
牛繁豪華盛合 $688
拼盤中特上澳洲和牛肉眼扒原塊上，放喺爐上火光熊熊，油份極高，而極上霜降和牛肩翼板扒油份同肉味均衡充足，油花最勁嘅係特上牛五花，入口即溶。厚切牛舌食落爽口，同薄切葱花牛舌各有千秋。
葱燒鹽香牛舌 $88
所有肉類都輕輕加少少醬汁調味，有麻油、味噌等調成，由日本空運到港，味道微甜。而用來點肉亦有三款燒汁、味噌汁同埋辣醬，都係日本總店運來。
想食得再靚啲，仲有澳洲M9和牛肩翼板肉(zabuton)同牛板腱，都係稀有部位嚟，而每日限量8塊嘅極上厚切和牛板腱排，油脂豐腴，都係$198食得到。而最貴嘅日本宮崎黑毛和牛都係$288，同樣限量推出。
更多新店直擊： |
其他推介仲有壺漬牛肋條，美國Prime級牛肋條以味噌醬汁醃30分鐘，香濃惹味，一客兩件。雞肉就選用日本櫻姬雞，豬肉就必吃伊比利亞黑毛豬護心肉，肉味香甜唔羶，仲可以揀鹽、味噌或辛味噌調味，另亦有內臟、海鮮同蔬菜等可以燒。
壺漬牛肋條 $98
伊比利亞黑毛豬護心肉 $98
唔夠飽？仲有好多小食、飯麵，燒到熱辣辣，食個湯底至麵條都係日本運來嘅盛岡冷麵就最降溫喇。
盛岡冷麵 $58
地址：尖沙咀金巴利道40號MW Plaza地舖
文、相、片：Perrins