吓，又炸雞？今次終於都唔係韓式炸雞喇！呢間來自日本嘅炸雞專門店，當地有17間分店，最高峰每日賣過萬件㗎！舖頭將於21/7登陸香港，仲有香港限定嘅新口味，睇睇有咩咁特別！

店子招牌作有KARAYAMA定食，口感香脆有肉汁，以淺草緣秘傳醬油調味，另有芝麻蒜蓉、果香鹽味同時令醬汁三款醬汁俾食客點嚟食。時令嗰款，開店初期會係一隻以醬油做底再加秘製醬汁，食落甜甜地又辣辣地，三款醬各有風味。

嚟到香港，餐廳亦特別設計咗一款香港嘅限定口味炸雞，鐵板七味花椒炸雞。加入以多款辛辣調味製作嘅七味粉，仲有粒粒花椒，但唔使驚，唔嗆嘅，未至於好辣，幾香口咁啦，唔使點任何醬汁都好夠味。

另外，其他選擇包括鐵板南蠻他他醬炸雞、滑蛋炸雞丼、秘製芝麻蒜蓉白髮蔥炸雞丼等。每件炸雞都係參考炸豬扒店嘅炸物技術去炸，以淺草緣秘傳醬油調味料取代生薑和蒜頭等傳統香料醃製一天，上炸粉之後仲要冷藏兩個鐘，最後落油炸6分鐘再淋上醬汁，新鮮滾熱辣咁炸起上枱，保證入味、鬆脆又juicy。

日本店梅定食賣連稅¥637（港幣約$44），來到香港賣$59，係貴咗啲，但唔使飛去日本都有得食吖嘛。鍾意食炸雞嘅朋友，要密切留意喇！

KARAYAMA
地址：黃大仙中心南館地下G6舖

文：Perrins、Kar
相、片：Kar