呢排疫情咁嚴峻，好多人都會減少喺街外進食。以往返工前坐喺茶記或快餐店，食件蛋治飲杯奶茶先返工嘅日子，或者要停一停喇。如果唔夠時間喺屋企煮加食埋個早餐先出門口嘅話，快快手喺麵包店買個包都可以。除咗各大知名嘅連鎖集團麵包店外，各區都有唔少麵包小店呢。
旺角 開心餅店
圖﹕ 邊個估到咁IG-able嘅爆漿麻糬卷，原來係嚟自有25年歷史嘅老字號餅店！？呢間餅店每日都會推出唔同口味嘅卷蛋，好似抹茶、伯爵茶、黑芝麻等，味道超濃郁；入面嘅 cream好幼滑，一啲都唔膩，一個人都可以輕鬆食晒！不過每日只有好少現貨，上佢哋IG專頁直接預訂就穩陣啲！
九龍城 豪華餅店
圖﹕ soya1314
講到老字號，又點少得呢間1977年就開業嘅麵包店呢！小店賣傳統港式麵包，好似鹹豬仔包、腸仔包、椰絲奶油包等，咁多年都冇變，充滿童年回憶！最出名就一定係酥皮蛋撻，酥皮夠脆、唔油，牛油味又夠香！聽講連發哥都係佢哋嘅fans嚟呀~
太子 上野酵素麵包生活館
圖﹕愈嚟愈多餐廳以「純素」為主題，呢間作為全港第一間賣純素麵包嘅小店，就實係健康達人嘅心水啦！酵素麵包強調天然無添加，製作更為複雜。最吸睛嘅莫過於淡紫色嘅「紫玉酥」，酥皮香脆，芋頭蓉幼滑，香勁濃郁。
新蒲崗 常溫
圖﹕呢間小店最出名就係拿破崙啦！佢哋用最傳統、純手工嘅工序製作，拿破崙一共有九層，三層係手搓酥皮、兩層合桃蛋白餅、同四層牛油忌廉，層層相間，特別有口感呀。每日新鮮出爐，賣完即止，想食就要早啲到啦！
新蒲崗 嚐麥手作
圖﹕聽個名都知呢個小店主打手作麵包啦，老闆曾去日本、台灣學師，造出嚟嘅麵包口感較平時嘅實在，而且極有小麥香。麵包款式都幾創新，好似小山園抹茶奶油包咁，外型勁似港式嘅椰絲奶油包，但忌廉加入咗日本抹茶粉，連麵包都係抹茶味，抹茶控實like爆！
文﹕Kiko
編：Kar