旺角呢間新開嘅Cafe好有台灣Feel，唔單止因為白色簡約門面加上裡面裝修有特色啱打卡，仲要連店員都係講國語？原來係嚟自台灣嘅人氣店，主打創意三文治、燉飯等，而且係香港少見嘅兩層室內加天台露天座位，瞬間真係好有去咗台灣Hea嘅感覺！
 

桔梗嚟自台北，兩間分店分別主打三文治同燉飯，而旺角店就有齊晒！而且環境寬敞，枱同枱之間唔會太逼。地下最多文青擺設，而二樓同天台就有梳化位，想點Chill你話事。
 

餐車風早午餐 龍蝦酪梨白酒奶油醬汁（$148）

香港嘅限定Brunch！滑溜蛋捲裡面有芝士，上面就係加咗白酒嘅白汁龍蝦、牛油果（酪梨）、墨魚同魚肉。龍蝦肉相當彈牙，同帶淡淡酒香又Creamy嘅白汁非常夾，而其他配料就增添口感同味道層次。
 

旁邊嘅焦糖洋蔥抹醬亦有水準，配烘過嘅香脆法包食味道啱啱好。沙律就配上特製醬汁。細食嘅女生們建議Share嚟食。
 

海洋風三明治 炸軟殼蟹與檸檬香草酸奶（$148）

台灣熱賣三文治，一個字：大！炸軟殼蟹已經夠大，一隻軟殼蟹已經近手掌大，裡面除咗兩隻軟殼蟹之外，仲有炸龍脷柳、炒蛋同醃漬紅甜椒，大份兼足料。
 

炸軟殼蟹非常酥脆，炸魚肉亦外脆內嫩，而且兩款炸物都無油膩感，配上酸中帶辣、又有香草香氣嘅檸檬香草酸忌廉就唔會覺得Heavy。不過建議大家都係把握時間食，因為有醬汁同炒蛋，擺得太耐炸物就唔夠香脆啦。
 

 

當日昔昔（$68/二人份）

Smoothies（果昔）亦係台灣店熱賣項目，每日都有唔同口味，好似開飯仔拍攝呢日就係莓果堅果Smoothies，紫紅色酸酸甜甜嘅雜莓Smoothies配上綠色嘅南瓜子、餅乾碎等，好味得嚟其實都有飽足感！
 

留意返旺角店係自助形式，落完Order要自己取餐。每日17:00前供應早午餐同三文治，想試燉飯就要等到17:00後。天台花園供應唔同味道嘅水煙，價錢$280起。
 

桔梗
地址：旺角砵蘭街160號地下至2樓

文、相、片：Cathy