旺角呢間商場中庭突然多咗間甜品店！粉色主調加上小熊主題，打卡點超多。三款口味梳乎厘班戟當中以限量發售嘅金箔最搶鏡，另外兩款口味就勝在可以自己裝飾。仲有兩款造型可愛又晶瑩剔透嘅小熊水滴菓子。而且甜品收益仲會捐贈畀慈善團體呀！
 

韓國美妝品牌LANEIGE將會喺3月16號至24號期間，開設期間限定嘅LANEIGE Sparkling Café，去到旺角朗豪坊認住粉藍色小屋上面有班戟同熊仔裝飾就係啦。
 

黃金Sparkling梳乎厘班戟 （$35）（每日限量35份）

Cafe將會供應近年大熱嘅梳乎厘班戟，選用優質麵粉、牛奶、雞蛋，同嚟自日本最高級而且低GI（升糖指數）嘅「百年之蜜」。呢款每日限量35份嘅黃金Sparkling上面仲會加上矜貴金箔同白士多啤梨點綴。連熊仔軟糖同忌廉上面都有金箔碎片裝飾，夠哂閃！
 

粉紅雲朶梳乎厘班戟（$35）

粉紅色呢款就非常有春天氣息，三層梳乎厘班戟上加上粉紅色忌廉，再附爆谷、棉花糖同朱古力碎畀大家隨意裝飾，粉紅色朱古力碎舖喺棉花糖上面，好有櫻花花瓣Feel呀。
 

閨蜜小熊梳乎厘班戟（$35）

粉藍色嘅梳乎厘班戟就改以藍色小熊軟糖同薰衣草裝飾，一樣咁啱相機食先！記得加埋紙牌裝飾，上面嘅字句夠哂過癮，好似 #SparkleMyWay、#食飽先有力減肥、#女人的浪漫 等等。
 

甜睡小熊水滴菓子（夢幻粉紅）（$35）

甜睡小熊水滴菓子（幻彩星空）（$35）

而熊仔造型嘅水滴菓子造型夠哂可愛，上面仲有金箔碎片點綴，不過果子本身無乜味，要靠旁邊嘅爆珠同加黑蜜增加味道。
 

購買任何一份甜品，都會獲贈LANEIGE$35現金禮劵一張，而且甜品所有收益將會全數捐贈到願望成真基金，幫助重病兒童實現佢地嘅心願！
 

而且只要將你嘅相上載到Facebook或Instagram，加返指定Tag同設為公開，就可以免費打印一張即影即有！同時亦有LANEIGE全新產品試用區，一站式滿足各位女孩子打卡、食甜品同扮靚嘅願望呀。
 

LANEIGE Sparkling Café
開放日期：2018年3月16日至3月24日
開放時間：11:00-23:00（甜品供應由12:00起）
地址：旺角朗豪坊4樓通天廣場

文、相、片：Cathy