茶飲店已經開到成行成巿，係乜嘢驅使再有新品牌插旗開業？係專業同創意呀！旺角新開嘅呢間花果茶飲店，揉合中西方嘅元素，加上以雞尾酒同精品咖啡嘅專業調配技巧去製茶，例如全港首創嘅N₂ Cheezzino泡沫化技術，創出口感輕盈而味道香濃嘅芝士奶蓋。

花果飄零堅持每杯花果茶都係由新鮮生果同原片茶葉加以壓碎，再以人手即點即製而成，無添加任何精製糖，既健康亦有水準。半開放式嘅設計，令客人都可以欣賞到手工壓茶、冰滴萃取、虹吸等調製過程。即使行開行埋，都仲可以透過youtube直播，隨時睇到舖內嘅情況，望下幾時輪到自己杯嘢飲。

 菊花龍井Cheezzino

平時好鍾意飲奶蓋嘅朋友，要試下佢哋嘅N₂ Cheezzino系列。透過注入氮氣，將煮好同冷卻咗嘅芝士醬泡沫化，令到層奶泡口感變得超級light，同埋好滑，飲多幾啖都唔會膩。而芝士餘香又會繼續留返喺度，同往常飲開嘅感覺都幾唔同。

焦糖珍珠厚奶茶

比起一般嘅珍奶，呢杯厚奶茶甜度適中，奶同茶嘅比例剛好，珍珠軟腍。最特別係面層嘅焦糖脆片，係灑完糖粒後再用火槍輕輕一燒做出嚟嘅，微微焦香又帶脆嘅口感，就好似焦糖布甸面頭嗰層脆片一樣。至於下層嘅厚奶茶，則係以兩種唔同嘅奶快速手搖而成。

 Made in 852鹹檸柑桔話梅龍井

本土品牌當然撐本土品牌啦，呢杯Made in 852就由個名到材料都相當「香港」。舖頭特意選用百年老字號冠珍醬園所釀造嘅鹹檸醬，配埋富有香港特色嘅柑桔同話梅，加入龍井茶調製而成。入口清香，鹹鹹地酸酸地又甜甜地。

 蘋果Mojito

睇個名就知呢杯蘋果Mojito嘅靈感嚟自Mojito雞尾酒啦，沖製方法亦同整cocktail一樣，以烏龍茶為基調，先透過手工壓茶嘅方法，將原片茶葉磨碎，再加水沖壓成濃縮花茶底。再加入新鮮蘋果、台檸、澳檸、薄荷等，用shaker手搖出嚟。飲落薄荷冰感唔算好重，但勝在酸甜有致，帶出小清新嘅清爽感覺。

 招牌花果茶

咁多杯茶飲嚟講，招牌花果茶就girlish喇。陣陣花香同果香嘅味道，係嚟自佢哋每日親自熬煮嘅自家製洛神花醬、新鮮蘋果同黃檸青檸，加上清雅嘅四季春茶作茶底，完全係女生嘅飛佛。

至於舖頭個名——花果飄零——原來係取自新儒家思想中嘅一句話：「花果飄零，靈根自植」。店主相信並鼓勵喺呢個年頭，因為唔同原因而散落咗去唔同地方嘅香港人，仍然可以落地生根，繼續活出香港嘅文化；就好似舖頭融合咗西方嘅技術，以本土特色嘅食材創作出多款獨有嘅茶飲一樣。

花果飄零
地址：旺角亞皆老街8號朗豪坊4樓20號舖

文、相、片：Kar