新世代食飯，唔淨止要餵飽自己，仲要餵飽對眼同埋相機。旺角商場頂樓有間漢堡店，最近推出咗一系列嘅新菜式，可以一次過滿足晒呢啲要求啦。喺你面前即刨嘅熱溶芝士漢堡、滿到瀉嘅髒髒咖啡、充滿仙氣嘅雪糕新地……準備好你哋嘅手機同埋胃口啦。

幾款新菜式入面，最剎食嘅應該係熱溶拉可雷特芝士漢堡啦。漢堡肉選用澳洲和牛、美國頂級USDA Prime牛肉等唔同部位製成，經過冷燻令肉味更香濃。而重頭戲當然就係即場現刨熱溶芝士啦！店員捧住烤過嘅Raclette芝士，大刀大刀咁將熱溶嘅芝士刮呀刮呀，刮落你面前嘅漢堡度，淨係望住都流晒口水啦芝士控。影相唔好影太耐喇，熱溶芝士唔等人呀！

餐廳都好照顧素食者嘅需要，同樣都係漢堡，但就係三款素食漢堡！呢個迷你未來漢堡拼盤，即將會喺今個月底推出，三款分別係嚟自美國嘅新興素肉，以植物原料製成漢堡扒嘅未來肉、素豬肉同埋野菌，食落都好juicy下。

作為專業嘅打卡員，點可以淨係打主食，而冇甜品同飲品（誤）？日韓台都紅爆嘅髒髒咖啡，唔使飛都有。呢杯espresso，大家嘅注意力一定會去咗佢嘅造型度先啦。上枱後客人可自行加奶，倒出嚟嘅奶泡非常綿密，一路倒，睇住啲泡一路瀉，係有種治癒感嘅。不過，睇完外表都可以留意埋佢嘅內涵。呢杯集咗嚟自巴西、印尼、哥倫比亞同危地馬拉嘅混合咖啡豆磨成，口感順滑又有堅果香。

至於冰鎮朱古力蛋糕新地同樣適合打卡，因為，有仙氣啊~~~ 朱古力蛋糕用72%黑朱古力製作，苦苦地咁，襯返軟雪糕食就可中和。

呢杯Evil Snow White，笨唔係普通嘅奶昔，而係加咗曲奇雪糕、忌廉同埋vodka、香草利口酒調配而成嘅cocktail奶昔啊！曳曳啊，溝埋一齊，辣口嘅vodka都變得甜咗。BTW雖然餐廳喺天后都有間舖，但呢幾款吸睛新菜式，只係得旺角店限定咋。

Texas Burger
地址：旺角亞皆老街8號朗豪坊12樓1A號舖

文、相、片：Kar