明白嘅，人都係有啲貪心嘅，想食日本菜但又覺得有啲悶，想食韓國菜但又覺得無乜新意？最近喺旺角開張嘅呢間專門店就滿足到你嘅願望！首爾弘大大熱吉列牛專門店開到嚟香港，而且除左吉列牛定食之外，忌廉烏冬等主食都相當吸引！
 

Kobekyu主打日韓Fusion菜，喺韓國有十幾間分店，深受年輕人歡迎，當中喺首爾弘大嘅分店更加係人氣長龍店！而叫得做吉列牛專門店，連燒牛肉塊版都特別過人，同韓國分店一樣用嘅係厚身鐵板，除咗溫度夠高無咁容易黐底之外，仲有效減少油煙，食完都唔怕帶住一身油煙味返屋企。
 

吉列牛用嘅係美國肩脊肉，食嘅時候將炸過嘅牛肉放喺鐵板上面。建議點火後先等20-30秒，鐵板變熱後將牛肉先燒兩秒，反轉另一邊再燒兩秒，咁就啱啱好係Medium嘅熟度。食落牛肉非常嫩滑，同時帶肉筋少少煙韌嘅口感。
 

燒完可以點啲秘製沙律醬、豉油同Wasabi，夾落味道香而唔膩。略嫌吉列皮唔夠脆，真係鐘意食香脆口感嘅可以輕輕燒一燒埋塊吉列皮。
 

另一招牌就係忌廉烏冬，咖喱忌廉牛肉烏冬上面一圈圈白色嘅就係忌廉，唔好以為咁多忌廉就會好Heavy，相反忌廉Creamy得嚟口感相當輕盈，有奶香之餘仲有啲沙沙地嘅口感，原來係加咗薯仔蓉。上枱後相機食先嘅朋友仔記得要眼明手快，唔係忌廉就有可能會塌啦。
 

大家可以先食少少忌廉，再將下面嘅咖喱烏冬撈埋忌廉一齊食。咖喱汁亦係經過調配，將日式咖喱偏甜嘅口味改為甜中帶辣，香料味亦再重啲，撈埋忌廉之後香、滑、甜、辣得宜。
 

餐牌上面仲有唔少飽肚選擇，例如肥牛雜菜Shabu Shabu同雪冰冷麵，而呢碗牛裡脊肉蓋黑糯米炒飯就係惹味又抵食推介。
 

飯上面嘅裡脊肉同吉列牛一樣嫩滑有咬口，用少少黑椒帶起牛味就足夠。下面嘅黑糯米炒飯加咗蝦肉、洋蔥同韓式辣醬汁，辛辣香味由脷底滲出，唔會太嗆又夠過癮。
 

當然亦有一啲小食提供，好似唔少人必嗌嘅Kobekatsu秘製蛋卷，一切開蛋卷入面嘅芝士就會咇出嚟，做到最吸睛嘅拉絲效果。
 

香港分店有韓國廚師坐鎮，之後亦會繼續鑽研更多香港店獨有新菜式，就好似呢杯Rose Garden咁，餐牌上面都未有㗎。以後唔洗妒忌飛韓國嘅朋友，去一轉旺角可以食到更多人氣美食啦。
 

Kobekyu 吉列牛忌廉烏冬專門店
地址：旺角彌敦道726號17樓
營業時間：星期一至日: 12:00-15:00; 18:00-23:00

文、相、片：Cathy