喺旺角想平食牛扒又多一個選擇啦！呢間新開嘅石燒扒房占地3,000平方呎，暫時係香港最大間嘅石燒牛扒店。主打多款外國優質肉類，從最平嘅美國大理石扒、品質唔錯嘅澳洲和牛西冷、美國頂級牛小排，到石燒扒房比較少見嘅1++韓牛肉眼都有得揀。新張期間仲送小食吧免費任飲任食呀！
 

堅石燒供應石燒牛扒同韓式石頭鍋飯，石板選用花崗岩石板，密度高而且耐熱，熱度可維持15至20分鐘，之後有需要亦可以請店員更換石板。供應六款唔同肉扒，分量可揀200g、300g或400g。同一般石燒牛扒店唔同，呢度係向店員落單，可以問清楚再揀心水食物。
 

三大牛扒推介

美國大理石（$78/200g，$108/300g，$138/400g）

價錢最低但依然有質素，燒起嚟脂香相當濃郁，亦做到油花入口即溶嘅口感。帶獨特肉香，唯一扣分點係口感比較韌。大理石扒會先由廚師預先燒熟表面，建議大家自己用石板燒至半熟。
 

澳洲和牛西冷（$228/200g，$308/300g，$388/400g）

澳洲和牛係性價比高嘅選擇，油花分佈平均細密，輕輕燒熟以鎖住肉汁。切開燒熟後牛味香濃，簡單加上喜馬拉雅山岩鹽同黑椒已經非常香。
 

1++韓牛肉眼（$288/200g，$358/300g，$458/400g）

坊間比較少石燒牛扒店會供應韓牛，呢度用嘅仲係當中最高級嘅1++等級！韓牛會以生肉切片嘅方式上枱，即燒即食口感最好。韓牛嘅肉味同脂香平衡，肉片軟嫩多汁。
 

 
其他肉扒介紹

韓國豬腩片（$98/200g，$138/300g，$168/400g）

唔食牛嘅朋友仔就可以揀韓國豬腩片，塊塊肥瘦相間，放喺石板上可以燒出油花香，食落無想象中咁油膩，反而幾甘香，係另一個抵食之選。
 

美國牛板翼（$128/200g，$178/300g，$218/400g）

呢個部位相對脂肪較少，所以食落以牛肉香為主，難得口感唔韌而係偏爽口。最啱唔太鍾意油花感，或者想食重牛味嘅朋友。
 

美國頂級牛小排（$188/200g，$258/300g，$328/400g）

頂級牛小排色澤鮮紅，口感鮮嫩Juicy。而且油脂分佈亦平均，適合各種熟度。
 

加$30可以享用小食吧嘅飯、意粉、湯、沙律同凍熱飲品，而家新張期間（至2019年8月31日）仲免費送埋！
 

食到飽晒最後記得去呢部睇落有啲似電話亭嘅「去味機」，因為㩒個掣部機就會噴出有香氛嘅水霧，幫大家除去身上嘅燒肉味，食完燒肉去行街甚至返Office都無有怕啦。
 

堅石燒
地址：旺角彌敦道565-567號銀座廣場LG樓

文、相、片：Cathy