情人節係一年一度攞正牌放閃嘅大日子，當然要精心細選間打卡餐廳同另一半慶祝啦。正所謂，平有平食，貴有貴食，最緊要好食。嗱，平、中、貴嘅餐廳都揀咗幾間畀你哋喇，溫提一下，揀啱就早啲卜定位，唔好到時要女朋友仔陪你一齊等位呀，扣分架。
人均$500以下
與海鮮有個約會 Bélon Vin Restaurant 
如果另一半係海鮮控，情人節嚟呢間餐廳撐檯腳就一定加分！餐廳裝修有情調，菜式包括法國蠔后吉拉多、法式龍蝦湯、香煎銀鱈魚等。海鮮選擇多多，而且價錢算實惠。
浪漫情人節餐
供應日期﹕2月14日
價錢﹕$398 （每位）
法式情人節套餐 Moreish & Malt
圖﹕Moreish & Malt官方Instagram專頁
情人節晩餐氣氛最緊要！呢間餐廳佈滿一個個心型氣球，簡單而又不失浪漫~情人節套餐一共提供6道菜，包括香煎劍魚配菠蘿莎莎、鵝肝多士、低溫慢煮法國鴨胸等！餐廳仲會免費送張即影即有添呀，同honey留住今年最sweet嘅moment~
情人節二人餐
供應日期﹕2月14日
價錢﹕$449 （每位）
多款甜品buffet Eat@ease
情人節食buffet都唔一定好貴嘅，呢間酒店推出嘅情人節buffet，有各式海鮮、扒類、意大利麵等，而且仲有好多精緻嘅甜品，人均都係大約500蚊咋。
浪漫情人節自助晚餐
供應日期﹕2月14-15日
供應時間﹕18:00-21:30
價錢﹕$488（成人）、$428（小童）
人均$500-$1000
食肉獸buffet 紅煙窗餐廳
圖﹕恆豐酒店官方網頁
想另一半食得開心，就當然要投其所好啦！如果佢係無肉不歡嘅話，一於帶佢嚟呢間酒店食buffet！澳洲M9極黑和牛扒同美國頂級AAA級肉眼牛扒都有得食，濃郁嘅肉香、滿滿嘅油花，絕對係食肉獸最愛。同場仲有唔同海鮮、扒類提供，夠晒豐富！
「極尚和牛冬之戀」情人節自助晚餐
供應日期﹕2月13-14日
供應時間﹕18:00-21:30
價錢﹕2月13日 $558（成人）、$358（小童）；2月14日 $588（成人）、$388（小童）
簡約高級4道菜 Cornerstone
呢間餐廳走小酒館風，causal得嚟又不失優雅，今年仲入選米芝蓮嘅車胎人美食推介呢~ 請另一半嚟食一啲都唔失禮，兼且氣氛仲輕鬆舒暢。佢哋嘅情人節套餐共4道菜﹕耶路撒冷朝鮮薊、布朗湯天使麵伴法式海鮮湯、和牛腰腹部細肉同芝士餅，菜式配搭特別，落足心思~
特別情人節套餐
供應日期﹕2月14日
價錢﹕$588（每位）
意式5道菜套餐 Theo Mistral by Theo Randall
好多情侶都會揀喺情人節食西餐，感覺浪漫啲嘛。呢間餐廳推出5道菜套餐，包括香烤龍脷魚柳配炒薯、香烤美國牛柳扒配燒雜菜等，其中最吸引嘅莫過於佢哋嘅自家製海鮮芝士雲吞，加入咗龍蝦、蟹肉同大蝦，仲有軟芝士、番茄等，食落非常有層次！
意式浪漫享受
供應日期﹕2月14日
供應時間﹕18:00-20:00；18:30-22:30
價錢﹕$788（每位）（18:00-20:00）；$888（每位）（18:30-22:30）
中式情人節 粵
邊個話情人節係西餐廳嘅專利？食中菜一樣得！呢間中菜館提供6道菜嘅情人節套餐，其中碟玉環竹笙菜苗設計成心型，中式同樣可以有心思！甜品仲有係女生見到都會心心眼嘅粉紅朱古力火鍋，由頭sweet到落尾！
為你「中」情甜蜜晚餐
供應日期﹕2月8、14日及3月14日
價錢﹕$810 （每位）
人均$1000以上
正宗懷石料理 嵯峨野
掛住日本鄉下嘅，可以去呢間提供正宗懷石料理嘅餐廳呀。7道菜包括松葉蟹肉伴醋啫喱、醋伴生蠔、刺身、鹽燒喜知次、和牛火鍋或燒鍋等，食材選自日本，保證新鮮，甜品仲有雪糕同朱古力蛋糕。款款精緻，另一半實收貨。
情人節懷石晚膳套餐
供應日期﹕2月14日
價錢﹕$1,700（每位）
米芝蓮兩星法國菜 Arbor
圖﹕clarasy、餐廳提供
一年一度嘅情人節，為咗氹另一半開心，出手係要闊綽啲嘅！呢間法國菜餐廳今年成為米芝蓮兩星餐廳，以日本珍饈結合法式烹調，水準絕對有保證。情人節套餐共8道菜，包括金槍魚、紅蝦、金目鯛、和牛等矜貴食材。配埋玫瑰香檳，帶上淡淡嘅香甜，呢餐仲唔由內到外到返內都咁甜？
情人節晚餐
供應日期﹕2月14日
供應時間﹕18:30至深夜（最後點餐時間為21:30）
價錢﹕$2,688（每位）
文﹕Kiko
編：Kar
