蠔迷注意！旺角新開一間以蠔為主題嘅粉麵小店，由負責人Louise開設及主廚Joey主理，Joey係本地第二代蠔民，家族以前喺流浮山及內地沙井一帶養殖蠔，知名售賣蠔製品嘅陳祥記亦係佢地家族生意。以往主要供應畀酒樓，但因為希望散播食蠔文化，而且由細到大都養蠔，好熟悉如何利用蠔去烹調料理，就開間實體店試試。

店舖嘅蠔全部自家供應，每日由流浮山新鮮運到，品種為本地「香港蠔」，比起平時大家常接觸到嘅法國蠔或日本蠔，香港蠔重蠔味，而且特別飽滿。

鮮蠔湯米線($58)

先將鮮蠔用蔥、蒜及少量辣椒等材料炒香，由於炒嘅過程中蠔嘅水份會不停滲出，將蠔嘅鮮味帶出，再連同炒過嘅蠔及蠔湯倒入用肉類熬製嘅米線湯底中，又鮮又惹味。鮮蠔份量約6-8隻，會根據大細而定～

香脆蠔餅($58)

平時食開嘅蠔餅都係細細粒，而呢度係用大大粒鮮蠔，將鮮蠔、蔥等加入秘製脆漿後炸，入口香脆，而且啖啖蠔肉。

蜜餞煎金蠔($98)

近幾年興食金蠔，金蠔即係將鮮蠔晒兩日，蠔味更加濃郁，又無蠔豉咁乾相對 JUICY啲。金蠔煎香後灑砂糖上面，味道比加蜜糖更好，甜甜鮮鮮咁。

胡椒鮮蠔湯($88)

天氣涼涼地，呢碗胡椒鮮蠔湯就啱晒！湯底用豬筒骨、雞及火腿熬製五小時，上枱前放入大蠔焯一焯，最後簡單用胡椒調味，湯味道特別鮮㗎～

蠔仔粥($68)

一樣道理！蠔水份會喺煮嘅過程不停滲入粥內， 味道一樣咁鮮啊～加埋辣菜脯食仲正！

第一蠔粉麵

地址: 旺角西洋菜南街258-260號長寧大廈地下C及D號舖

文: Yanica

相、片: Calvin