經常高鋸於日本樂天市場網站人氣手信榜嘅Irina嚟到香港，喺銅鑼灣開設首間海外分店，售賣各款賣相可愛嘅招牌迷你卷蛋，口味有成25款添！而且，舖頭仲有用咗25件卷蛋砌成嘅4層迷你卷蛋，用嚟做party cake或者生日蛋糕都一樣咁正！

甜品櫃有齊舖頭25款不同口味嘅迷你卷蛋，全部由日本製作好再直送到港，味道夠正宗。至於有邊25款口味？一次過數你知：乳酪、士多啤梨、布丁、抹茶、雜果忌廉、白朱古力、甜酒葡萄干、原味、檸檬、咖啡、Tiramisu、紅莓、開心果、日本栗子、椰子、橙味、南瓜、朱古力、櫻桃、芝士蛋糕、焦糖、黑芝麻、杏仁豆腐、香蕉及甜醬油。價錢為$28/件。

呢3款卷蛋可算是人氣口味，有（左）原味、（中）抹茶、（右）Tiramisu，原味卷蛋雖然未算非常鬆軟，但入面嘅忌廉濃郁又滑溜，而且分量細細件，用嚟下午茶都唔會有罪惡感。

有啲卷蛋仲有不同花紋，有波點有直紋有斜紋，好繽紛。而卷蛋入面除咗忌廉，仲會有不同餡料架！好似直間嘅甜醬油味，入面除咗有甜豉油忌廉，仲有口感煙韌嘅日式年糕及和三盆蛋糕。

店子皇牌！4層迷你卷蛋

呢個4層迷你卷蛋會將指定口味嘅25件迷你卷蛋、忌廉以及水果砌成4層，營造出蛋糕款，賣相靚，食嘅時候又不只單一口味，最啱做party cake！美中不足嘅係，4層迷你卷蛋必須跟指定口味，不設自選架！價錢為$780。

先擠上忌廉，然後開始擺放卷蛋。

然後將卷蛋逐層疊好。

再加入各款水果，有士多啤梨、紅桑子、藍莓、黑莓及紅加侖子。

最後綁上紅絲帶，就大功告成。

另有3層版本，可自選12件心水迷你卷蛋，價錢為$420。

Irina亦即將推出香港獨有嘅卷蛋口味，究竟係乜？我哋暫時期待下先啦！

Irina
地址： 銅鑼灣勿地臣街1號時代廣場B1樓 cookedDeli by city'super

文：Joy