自認好食得辣嘅辣椒仔女同我入嚟！最近有間由東京嚟嘅過江龍辣麻拉麵店，開咗喺銅鑼灣，餐廳有25種配搭嘅麻辣拉麵選擇，仲用咗全世界最辣嘅卡羅萊納死神辣椒去製作！！！等住你哋去挑機啊！

呢度湯頭主要係得一款，就係以豬骨、雞殼、魚鮮等熬製超過8個鐘而成嘅秘製濃厚味噌湯，味道濃郁香醇，而且魚鮮味突出。不過，辣度同麻度就分成5個級別，由（白碗）唔辣、小辣、中辣、（紅碗）高級辣到（黑碗）鬼增辣都有得揀，造就出25種辣度嘅配搭。辣度由多款辣椒混合製作而成，當中仲包括有健力士世界紀錄大全最辣嘅卡羅萊納死神辣椒添！麻度則由烹調過嘅頂級和歌山葡萄山椒調製同其他多種山椒調成嘅香麻油所出。

嚟得就梗係冇奶油食唔辣㗎？至少都小辣啦，平時唔太食得辣但又想試下嘅話啱晒，辣度輕微。特製辣麻味噌拉麵，有溏心蛋又有兩大嚿慢煮叉燒，麵條係混合咗3種唔同粗幼度嘅麵（雖然就咁肉眼望未必望得出） ，索湯力一流，條條麵都啜得到啲辣香啊。至於嚿叉燒，以慢火煨成，微甜帶微焦香，口感軟腍，好好食。

玉米筍辣麻味噌拉麵呢就有好多條爽脆嘅baby corn喇，sharp sharp聲好鬼爽。呢碗係中辣嚟嘅，色水上都睇得出，相對上係深紅色少少，但依然係可以接受得到嘅辣度嚟。

至於高級辣呢，可以睇呢碗辣麻味噌拉麵。紅碗上陣，湯底色澤亦更加紅，混合咗8種特製唐辛子呀，係幾刺激嘅，有嗆喉嘅感覺，仲有陣陣麻感。

終極王者就係鬼增級嘅辣度同麻度，混合咗9種特製唐辛子呀，落咗幾款地獄級辣椒都未夠，仲要有死神辣椒！如果現場你見到邊位勇士隻碗係黑色嘅，請你畀啲掌聲佢！呢碗嘅辣度簡直就係世界級！後勁凌厲，麻辣感久久不散。

另一款同樣攻擊力高嘅，應該就係芫荽辣麻味噌拉麵喇！鍾意嘅人就會好鍾意，大大堆芫荽喺面，佢獨有嘅味道，令喜歡佢嘅人覺得零舍清新，嫌未夠多嘅話點餐時再叫增量，就可以得到座芫荽山喇！

胃口大啲嘅朋友仔，建議試完拉麵之後，可以追加多碗叉燒飯！

鬼金棒
地址：銅鑼灣謝斐道530號地舖

文：Kar
相、片：Tom Li