堅持品質半世紀 牛記茶室
(Photos by 手機上傳 & cherry tabo)
牛記對唔少香港人嚟講係半世紀老店，但對部分柴灣人嚟講可能係新店，事關牛記原本喺西環，因為業主加租轉折之下，喺2014年年中搬到柴灣。幸好老闆權哥各位老伙計都仲喺度，茶室嘅各款招牌小菜先得以保留，清湯蘿蔔牛腩煲同玫瑰花皇太后雞都係必點之作。新加茶市賣埋點心，無小菜咁出名，但平均水準都OK。
懷舊車仔豉油撈麵 財記粥麵
(Photos by Kan Lee)
唔少香港人都一定食過經濟實惠嘅車仔麵，但呢度嘅車仔麵唔係湯麵而係豉油汁撈麵。豉油汁調味得宜，配蛋麵一流。餸方面以咖喱魷魚最受歡迎，彈牙美味。心大心細嘅可以揀雜麵，有齊魷魚、豬紅、豬皮、豬腸、蘿蔔、魚蛋、螺肉、麵筋同菜心，食得辣嘅記得要加唔少街坊推介嘅咖喱汁。另外加腐竹同白果煲嘅白粥亦有唔少捧場客。
老牌街坊斬料店 新桂香燒臘
(Photos by JJcaptain & 小勁健)
斬料～ 斬大舊叉燒～新桂香最出名嘅燒味就係叉燒，用嘅係新鮮豬嘅脢頭肉，蜜汁唔太甜而帶出豬肉香味，叉燒外表紅潤入口鬆化。老街坊鐘意佢肥美而且有燶邊，需要Keep Fit嘅亦可以要求半肥瘦或者瘦叉燒，師傅都會盡量按你要求分比你。當然，要食靚叉燒都要付出代價，呢度嘅燒味價錢唔算大眾化，一個人嚟食碟頭飯會比較抵。
傳統舊式茶餐廳 香江茶餐廳
(Photos by Gourmet KC & Yinh)
老實講，單係呢間茶記就唔足夠好味到叫人跨區都要嚟試，但如果嚟柴灣做嘢經過嘅就不妨嚟呢度坐下，因為呢種舊式茶餐廳真係買少見少。當然入到餐廳又無理由齋坐嘅，呢度最多食客推薦嘅係炒粉麵。肉絲炒麵嘅生麵餅炸到金黃脆身，肉絲芡汁分量同調味都啱啱好，乾炒牛河香口唔油膩。奶茶咖啡亦有相當水準。
街坊食堂隱世大排檔 成記飯店
(Photos by 小連 & Arale_yuen)
傳統嘅排檔已經買少見少，而柴灣工業區熟食中心地下就仲有呢檔成記。必點之一粟米斑塊，魚柳鮮嫩雪白，粟米汁亦夠香甜，可以撈成碗白飯食。其他菜式亦絕不欺場，睇得出廚師嘅功架同鑊氣都非常有水準。如果你有其他嘢想食而餐牌又無嘅，可以試下問一問老闆成哥，有材料嘅就會煮比你，果然係街坊食堂。
簡單暖意最滿足 金記粥店
(Photos by jo_b)
除咗排檔，街市熟食中心亦係搵街坊食堂嘅好地方。呢間金記粥店一向都多街坊捧場，原因無他，就係粥底夠綿夠米香而且入口軟綿。而且除咗老友記，呢度都有唔少後生仔女嚟食呢度嘅特色炸兩卷，有蝦米、牛肉同叉燒三款，其實即係用有餡嘅腸粉嚟包香脆油炸鬼。蝦米就最香口，再點甜醬辣醬配白粥一流。
超厚雪糕格仔餅 BB雞蛋仔
(Photos by candycan & sum_jessica)
近年雞蛋仔大熱，除咗可以用嚟做雪糕筒之外仲可以加入唔同材料創新口味。呢間小店以無添加連BB都食得嘅雞蛋仔作招徠亦有唔少新口味，例如有比利時朱古力粒同焦糖。但呢度最多學生捧場嘅係雪糕格仔餅！香脆有蛋香嘅格仔餅夾各種口味包括朱古力、綠茶、芒果等等嘅雪糕，雖然雪糕唔係咩大牌子，但$18就有一份咁厚嘅雪糕格仔餅，邊度搵？
心機甜品小店 糖兄弟甜品屋
(Photos by Raul L. & homoon)
唔好以為舊區都無好嘅甜品舖，呢間小店係唔少街坊嘅心頭好。新鮮菲律賓呂宋芒會保證熟咗先用嚟整甜品，唔會食甜品反而食到一口酸咪咪。招牌甜品芒之戀人就有鮮打芒果汁、芒果肉、椰果同果汁珠珠配北海道3.6牛奶蛋白布甸，各種口感嘅芒果甜香同滑嘟嘟布甸非常夾。其他甜品例如芒果小丸子同雜果楊枝甘露都係心機之作。
隨時接收最新資訊
讚好OpenRice專頁！
