又到咗榴槤嘅季節，除咗早前同大家介紹過嘅榴槤放題（傳送門按此）外，最近亦有多間酒店推出榴槤主題嘅brunch同tea，榴槤控都蠢蠢欲動，個個都真的很興奮了。

榴槤自助早午餐　　唯港薈Silverbox 宴會廳

榴槤迷一定知道呢間酒店最出名就係食榴槤甜品，佢哋每年搞嘅馬來西亞榴槤節都好快爆滿，今年有機會食到喇，加碼有成10場榴槤自助早午餐呀！

　馬來西亞榴槤果肉拼盤、脆炸榴槤芝士和牛肉丸

　貓山王榴槤銀耳燉紅棗白玉湯、榴槤焗釀珍菌波士頓龍蝦

呢個brunch有16款榴槤菜式同甜品，一人一份上枱嘅有馬來西亞榴槤果肉拼盤、貓山王榴槤銀耳燉紅棗白玉湯同埋榴槤焗釀珍菌波士頓龍蝦。果肉拼盤一共有5款榴槤，包括肉身飽滿、味道濃郁嘅D197貓山王、甘甘甜甜嘅D175紅蝦、滑身而味道較淡嘅D163葫蘆等，仲有款神秘品種。湯品同龍蝦都相當有驚喜，完全冇諗過可以有呢個配搭呀，但又出奇地夾喎。加入榴槤核、冬瓜、雪耳同榴槤等一同燉製嘅湯品，清甜滋潤；龍蝦釀入鮮蘑菇、雞脾菇、靈芝菇、馬蹄、龍蝦肉、榴槤，焗至外脆內軟，口感豐富，不過榴槤焗完後嘅味道就唔算太突出。

　榴槤雪糕、班蘭榴槤蛋糕

　榴槤布甸、榴槤芒果糯米飯

另外仲有多款熱食同甜品可供選擇，好似脆炸榴槤芝士和牛肉丸、榴槤芒果糯米飯、班蘭榴槤蛋糕、榴槤泡芙等，記得要食埋榴槤雪糕喎。成餐由頭到尾都係啖啖榴槤香，有夠滿足。

日期： 7月16、23、24、31及8月7、8、14、21、28及29日
時間：上午11時45分至下午3時

榴槤‧香芒‧下午茶自助餐  城景閣     

　榴槤、芒果甜品、榴槤法式焦糖燉蛋

油麻地呢間酒店則結合兩大盛夏水果——榴槤同芒果製作多款甜品，包括即製榴槤雞蛋仔、榴槤梳乎厘、榴槤法式焦糖燉蛋、榴槤千層酥、酥炸榴槤、芒果/榴槤糯米糍等等，以自助餐形式供應，大家可以因應住自己嘅食量同quota任意選擇。另外亦有超過40款嘅冷盤同熱食，例如泰式沙嗲串燒、壽司同芒果米紙卷等。但要數到最吸引嘅應該係自選燕窩蟹皇粥喇。

供應日期： 7月1-31日，逢星期六、日及公眾假期
供應時間：下午3時至5時半

3D榴槤飄香蛋糕   柏景餐廳   

尖沙咀呢間酒店嘅buffet雖然冇榴槤，但佢哋推出嘅3D榴槤蛋糕同樣OP，驟眼望落真係以為係榴槤呀。表面一粒粒嘅「榴槤釘」係師傅逐少逐少唧上去嘅綠色忌廉，「樹幹」則以朱古力仿製而成，像真度99.9%！切開入面係層層相間嘅榴槤吉士忌廉同海綿蛋糕，仲有真‧榴槤果肉！口感幼滑，滿滿榴槤香。大家身邊有冇榴槤控係呢幾個月生日嘅？即刻唔使煩去邊揀蛋糕咯~

訂購日期：7月1日至9月30日

文、相、片：Kar