一杯咖啡，唔單止係提神或者享受，同時亦可以係一種生活態度！呢間支持公平貿易嘅機構最近開咗間Pop-up Cafe，用旗下品牌嚟自唔同公平貿易產區嘅優質有機咖啡豆變成唔同咖啡同特飲。同時亦供應香港藝術蛋糕師用公平貿易原材料製作嘅精緻蛋糕，令你嘅一次消費發揮社會影響力！
 

推動公平貿易嘅本地社企公平棧今年踏入15週年，旗下自家品牌細味公平最近就同孖人廚房嘅Taste Kitchen合作，開期間限定精品咖啡店「Cafair•Taste」，既係咖啡店，亦係工作坊、展覽、同零售點！
 

咖啡選用細味公平100%高品質Arabica公平貿易咖啡豆，喺香港烘焙，而咖啡豆嚟自秘魯、加幼山脈、埃塞俄比亞嘅公平貿易產區。希望令第三世界農民得到應有嘅公平待遇，品牌「公平婦作」工場更推動基層婦女就業，當然值得支持。
 

Latfair鮮奶公平（$40）

期間限定咖啡店有駐場咖啡師為大家沖調各款咖啡同飲品，以Double ristretto加上牛奶嘅Latte口感柔滑，酸苦平衡而帶少少栗子香氣。
 

Faircara Soda公平梳打（$35）

怕咖啡苦嘅朋友可以一試，Cascara即係咖啡果肉，平時我哋飲咖啡用嘅咖啡豆就係咖啡果嘅種子，呢杯梳打就用咖啡果果肉加細味公平嘅蔗糖煮成糖漿，再加檸檬汁同梳打水，飲落Sparking氣泡口感，加上檸檬同咖啡果嘅水果酸香，相當Refreshing。
 

Fairange Rum Mocha冧冧公平（$90）

咖啡亦可以變身Cocktail，睇個名冧冧公平可能都估到，呢杯睇落似普通咖啡嘅Cocktail其實加咗用橙皮浸過嘅冧酒，再加細味公平嘅朱古力、Espresso、牛奶、鮮忌廉，再灑上陳皮乾同橙皮點綴。聞起嚟以陳皮香味為主，飲落先係冧酒味，再有橙香同朱古力甜味。
 

（左）Fair Jasmine公平茉莉、（右）Fair Grey公平伯爵（各$35）

除咗咖啡，呢度亦有好啱消暑嘅冷泡茶，選用細味公平原片茶葉低溫浸泡。茉莉茶葉嚟自江西大鄣山海拔800米高山，經新鮮茉莉花三重拌合窨製，花香突出茶湯清澈。而伯爵茶就採用印度大吉嶺海拔1520米高山茶葉加佛手柑香氣，有獨特嘅柑橘香氣。而且膠樽用100%回收膠物料製成，推動公平貿易亦支持環保呀。
 

Better than Ever苦與樂（$88）

Cafe唔單止有飲品，亦有蛋糕食，呢間Pop-up特別同藝術蛋糕師Manci主理嘅M Patisserie合作，分兩期推出共六款採用細味公平食材製作嘅主題蛋糕。好似呢款苦與樂就用細味公平嘅多明尼加可可粉、墨西哥咖啡粉同埃塞俄比亞耶加雪菲咖啡豆，變成咖啡慕斯、朱古力慕斯同黑朱古力蛋糕。
 

上面嘅朱古力波波裡面其實放咗咖啡豆，淋上熱espresso就會見到。熱espresso加上融化嘅朱古力味道苦甜平衡而有層次，黑朱古力蛋糕配espresso亦係亮點之一。
 

Hakuna Matata快樂時代（$58）

雪白嘅忌廉下面係用細味公平嘅印度Earl Grey茶葉製作嘅海綿蛋糕，再以烏茲別克斯坦桑椹同車厘子、有機食用花點綴。
 

海綿蛋糕有香濃Earl Grey茶香，口感比較濕潤略欠鬆軟，不過配埋桑椹同車厘子嘅微酸，味道討好。兩款蛋糕賣相都好啱相機食先，而下半期更有三款以女性為主題嘅蛋糕，唔好錯過！
 

呢度亦有售賣細味公平嘅產品，包括熱賣No.1有機腰果糖、Cafe率先推出嘅全新精品咖啡系列 「FAIRTASTE PREMIUM - Specialty Coffee」、唔同茶葉、果乾等。牆上嘅布唔單止有介紹品牌歷史同公平貿易，亦寫上唔少咖啡相關嘅冷知識。週末仲會舉辦多個工作坊同分享會，絕對係放假好節目。
 

Cafair•Taste
活動日起: 即日起至2019年5月12日（星期二至五12:00-20:00，星期六、日及公眾假期11:00-21:00）
地址: 中環鴨巴甸街35號PMQ元創方B座Hollywood一樓H113 - H114「Taste Kitchen」

文、相、片：Cathy