近年越嚟越多素食選擇，今次深水埗呢間新店更加係素食Cafe，部分蛋奶素菜式更可以轉為全素或走五辛，夠貼心！菜式有齊日式及西式選擇，好似日式定食、意粉、漢堡等。裝修以白色同木紋為主，環境舒適最啱Hea返下。
 

YEARS由Kay同太太一齊打理，兩位去唔同地方旅遊嘅時候發現外國有唔少素食餐廳，另佢地開始有將更多選擇帶到香港嘅念頭，最後就變成呢間餐廳。Kay負責西餐，太太Kit就負責日式料理。Menu上有標明係咪有蛋、奶或者五辛成分，有特別要求亦可以落單前向店員查詢。
 

日式定食（$88）

素食都可以好豐盛！呢個定食有齊麵豉湯、什錦配菜、烏冬同甜品。麵豉湯選用比較少見嘅白味噌，熟成時間較短而且味道溫和，比起鹹味反而甜味更突出，同重黃豆味嘅豆腐配合得宜。另一推介係高野豆腐，類似火鍋常見嘅蜂巢豆腐，質感似海綿食落相當綿密，配芝麻醬做前菜夠開胃。雞蛋半熟，而且蛋香濃郁。
 

其他配菜同甜品會不定期更換款式，好似開飯仔採訪呢日就有烤秋葵、炸紫薯餅、漬物，同抹茶蕨餅。秋葵比較清爽，炸紫薯餅吉利脆皮加上軟棉紫薯蓉口感豐富，漬物酸鹹爽口，而抹茶蕨餅亦有茶香，雖然回甘不及日本名店出品，勝在口感彈牙柔軟。主食烏冬亦採用日本讚岐烏冬，口感滑溜，配香甜腐皮簡單而滿足。
 

不可能漢堡包（$128）

Cafe另一主打係漢堡包，名當中嘅不可能其實係指Impossible™ Meat植物牛肉，以純植物製作但口感同味道都同牛肉相似！店主Kay喺外國試過後，覺得係一個好嘅機會畀平時少食素嘅朋友試下。
 

用Impossible™ Meat配搭火箭菜、車打芝士同洋蔥，Impossible™ Meat食落味道的確幾似牛肉，口感比一般漢堡扒鬆散少少，但一樣有肉汁效果。半熟洋蔥嘅辛辣後勁幾刺激，而車打芝士就增添香味芝士，Kay表示希望之後可以搵到合適嘅Vegan芝士，令食全素嘅朋友有更多選擇。
 

黑松露蘑菇漢堡包（$98）

另外亦有黑松露大蘑菇選擇，大蘑菇香味最突出，口感Juicy。配以沙律菜、蕃茄、車打芝士、洋蔥同惹味嘅黑松露蛋黃醬。特別一提呢度用嘅係無雞蛋成分嘅Vegan漢堡包，所以食落口感比較韌亦更有顆粒感。外脆內棉嘅炸蕃薯條亦係亮點，番薯自然香甜味討好。
 

 

野果多士（$48）（加雪糕+$8）

下午茶時段供應唔同輕食甜品，呢款野果多士就係其中一款人氣選擇。西多士煎至香口，食落以蛋味為主，配多球雪糕一熱一凍更刺激！除咗有士多啤梨等莓果之外，碟邊亦以紫薯粉同開心果碎點綴，不妨加埋一齊食增加口感層次。
 

玫瑰花茶（$42）

飲品方面就咖啡同花茶為主，玫瑰花茶當中有玫瑰、紅棗同桂圓，一倒就聞到好香玫瑰花味，飲起嚟帶淡淡甜味。
 

玫瑰咖啡（$36/熱）

咖啡聞起嚟就係玫瑰花香同咖啡香各半，咖啡唔會過酸同玫瑰花香幾夾。值得一讃嘅係咖啡師拉花手勢好，咖啡飲到底拉花都無走樣。可以轉為全脂奶、脫脂奶或Oatly燕麥奶。
 

YEARS
地址：深水埗福華街191-199號福隆大廈1號地舖

文、相、片：Cathy