太古坊糖廠街市集又回歸喇，今年規模更加係歷年來最大，有成40個攤檔，有齊美食、包裝食品及本地農產品等。頭炮繼續以咖啡為主題，本地品牌以外仲專誠請來台灣咖啡店參與，連食物都係同咖啡有關，等各位啡迷飲到更多特色靚咖啡！

11月限定嘅咖啡節有二十個品牌輪流參與，其中四個來自台灣，包括台北嘅All Day Roasting Company、COFFEE DPT、紙街咖啡館同高雄人氣店咖啡覺醒，4/11嘅紙街以實而不華嘅意式及手沖咖啡為主。

最搶眼一定係入口嘅Ralph’s Coffee，由經典品牌Ralph Lauren開設嘅咖啡店，綠色古董車係香港唯一一部，一定要打卡！咖啡同尖沙咀店供應嘅一樣，推介以Varlrhona朱古力沖成嘅Mocha同埋市集限定嘅Pink Lemonade。

鍾意飲手沖咖啡，就唔好錯過Elixir特別引入嘅紐西蘭名店Coffee Supreme單品咖啡豆，或者Black Sugar Coffee專誠為市集而設嘅Ethiopia Nensebo，飲落有士多啤梨果甜。仲有柴犬店長黑糖坐鎮！

呢杯紅色嘅唔係咖啡，而係以維他奶新出嘅專業沖調用豆奶加紅菜頭汁同朱古力調成嘅Beetroot Soy Latte，味道夾埋有紅豆味，比一般latte味道更light，而植物奶亦適合素食者飲用。

唔飲咖啡可以飲酒，香港首個氈酒品牌白蘭樹下有驚喜，選用本地草本及香料包括當歸、陳皮、白蘭花、薑等，再運去荷蘭釀製，白蘭花味突出清香，沖成三款雞尾酒特飲。而少爺啤酒廠嘅赤兔馬，以木莓、咖啡及可可釀成嘅德國小麥酸啤，有手沖咖啡風味！

現場仲有唔少咖啡豆、咖啡包可以買走。好似非洲精品咖啡，同埋The Coffee Academics單品咖啡掛耳包。

美食當然唔少得，第一時間食杯雪糕先！Teemtonefai著名Pantone色雪糕，粉紫色係蝶豆花同玫瑰味，加埋粉紫色自家製雪糕筒好elegant。仲有同Elixir crossover嘅honeycomb味，做affogato食非常之夾。

草民嘅朱古力焦糖奇脆餅乾杯，又環保又好食，一杯有焦糖醬、軟心朱古力、咖啡啫喱、脆米等多個層次，加埋燒棉花糖，好邪惡！Chef Tiff’s Kitchen抹茶同港式奶茶熔岩流心菠蘿包，流心餡好吸引！

專做外賣嘅雞翼專門店Wingman，有一系列美式口味好似水牛、燒烤、cajun等，今次特別推出咖啡雞翼，啡味濃郁，夠晒特別。

KONG by Bread and Beast避風塘蟹肉腸粉，腸粉加埋蟹肉、蟹子、脆蒜配芝士醬，香口又唔膩，另外仲有自家製葱油餅。

今年雙層巴士亦再度登場，上面仲有懷舊街機打！在場亦有音樂人Busking，用二胡彈奏《Happy》你聽過未？

去市集要支持環保呀，冇自備咖啡杯或餐具，可以俾$20按金租用，場內亦有洗滌區可以清洗餐具。

太古坊糖廠街市集

舉行日期：11月4日至2019年2月17日（逢星期日，12月2、23、30日及2月3日除外）

文、相、片：Perrins