沙田街坊等咗好耐嘅好消息——一田重新開幕啦！以後又多個地方行街街同搵好西食啦。今次重開，有多間嚟自日本嘅人氣餐廳首次進駐香港，仲有on tap嘅手工啤飲添，係全港第一個喺超巿內嘅生啤專櫃呀！
呢度有好多新鮮海鮮，單係生蠔就已經有好多款，由美國、法國、澳洲等地入口嘅都有。生蠔可以即開即食，亦可以交畀店員加入煙肉、花生碎、蝦米碎後即燒，再配埋泰式辣汁，微辣感覺一過，就令到鮮味更加突出。另外仲有蒸新鮮原隻亞拉斯加長腳蟹同龍蝦配薯條，兩樣都係限量供應，前者每日限量得5份咋！而後者都係得廿份。
第一次來港開店嘅大阪炸雞店，佢哋一直堅持日式工序，雞肉經過長時間醃製入味，炸出嚟外層脆卜卜，裡面嘅肉質就仲係好嫩滑，依然保持返啲汁喺度。多個雞嘅部位包括雞胸、雞翼等都有得食，但要數比較特別嘅就係手羽元啦，即係上雞槌，呢個位最香口。
同樣都係首次來港嘅日本居酒屋，主打串燒、天婦羅同丼類。睇住師傅逐串逐串咁燒，再搽上醬油，未食就已經先滿足咗視覺同嗅覺。招牌串燒雞丼一碗有齊自家製免治雞肉串、鵪鶉蛋串、大蔥雞腿串，同雞翼串。
主要係賣野菜拉麵同其他麵食嘅，特別在於佢哋採用日本老字號直源醬油。話說呢隻醬油有成200年歷史，以古法製作，味道濃郁，所以直源醬油叉燒沾麵嘅湯汁都相當濃厚。
呢間抹茶甜品店相信各位抹茶迷都唔會陌生，不過今次係佢哋首次進駐超巿，喺新開期間都有唔少著數。例如好似以特濃雙倍抹茶製作嘅抹茶2.0雪糕咁，就有八折優惠。新出冇耐嘅抹茶白朱古力曲奇呢度都有得賣，甜中帶甘澀，口感鬆脆。同舖仲有佢哋同八天堂聯乘嘅奶油蛋糕麵包添。
呢間喺日本有成百年歷史嘅人氣洋菓子店，都係首次登陸香港。佢哋以朱古力起家，但而家最受歡迎嘅就係用北海道牛油製嘅杏仁脆條，經過30米長焗爐以低溫製成，食落脆口，牛油同杏仁味都好香。
呢間舖主打玉子燒，喺其他一田超巿亦有分店，但係金箔玉子燒同鰻魚麥飯丼都係得呢間舖先有咋。除咗玉子燒，仲有新嘅甜品推出，長野縣蘋果雪葩嘅果香味濃，但最盞鬼係啲雪葩裝咗喺個細「蘋果」度。冬甩口味就有抹茶、士多啤梨等選擇。
嚟自東京嘅甜品店，每款鮮果撻同甜品都相當靚仔。
超巿都有得飲生啤？啱呀，你冇睇錯。平時去超巿最多都係買啲啤酒返屋企飲，但而家呢度新增咗個全港首個嘅超巿生啤專櫃，仲有4個tap頭咁多添呀！暫時on tap嘅有本地新品牌Carbon Brews 嘅石榴酸啤Aloha Sour、首次供港嘅台灣金色三麥嘅蜂蜜啤酒等。至於樽裝，有貓頭鷹常陸野，又有澳洲MoonDog，仲有唔少近嚟興飲嘅酸啤，好似The Wild Beer Co.嘅酒款咁，啱晒Beer Geek。
文：Kar
相、片：Tom