茶餐廳同Cafe加埋會係點？尖沙咀呢間新店就走Fusion風格，唔少菜式甚至咖啡都揉合港式元素，好似麻婆豆腐口味嘅意大利飯，用意式咖啡製作嘅鴛鴦等等。咖啡迷就可以一試坊間少見嘅比利時虹吸咖啡，席前即沖可以觀賞過程又有特色！
 

Plan B Cafe位於尖沙咀山林道，裝修以白色為主，加上有室外座位同大玻璃窗，感覺舒適寫意。老闆之前做咗20年設計師，一直都對飲食有興趣，繼之前頂手合發茶餐廳後，最近就開設呢間有香港特色嘅Cafe。
 

麻婆豆腐意大利飯（$138）

中西合璧嘅代表有呢款，將大家鍾意用嚟送飯嘅麻婆豆腐變成意大利飯，一方面保留麻辣香味，另一方面加入芝士，米亦選用意大利短米。食落先辣後麻，香料同肉香都相當濃郁，醬汁濃稠得宜，滑溜嘅豆腐同爽口嘅洋蔥亦增加口感層次，比想像中更夾！怕辣嘅話仲有另一款魚香茄子意大利飯（$138）可以試呀。
 

田園全日早餐（$128）

一般Cafe會供應嘅多士、全日早餐等呢度都有，素食朋友可以點呢款田園全日早餐，有番茄、茄汁豆、蘑菇、沙律、牛油果、黑松露炒蛋、吐司或牛角酥。黑松露炒蛋半熟，口感滑溜，黑松露香氣馥郁。牛角酥相當酥脆，富牛油香。
 

比利時窩夫伴草莓，雲呢拿雪糕（$86）

正宗比利時窩夫偏甜同偏硬，為咗迎合香港人口味，經過改良抽走咗珍珠糖。窩夫食落有啲似蛋糕，有雞蛋香、口感鬆軟但略乾，建議加埋雲呢拿雪糕或者配士多啤梨一齊食，味道同口感層次都更豐富。整體甜度適中，當飯後甜品都唔會太膩。
 

 

比利時虹吸咖啡（$68）

咖啡師會用特製嘅比利時虹吸壺喺席前沖煮咖啡，咖啡可自選單品豆。採訪當日就有衣索比亞日曬、危地馬拉水洗，同哥倫比亞厭氧處理三款選擇，都係嚟自本地Roaster，每月更換款式。
 

比利時虹吸原理同虹吸大致相同，但因為壺嘅設計唔同，咖啡萃取率比較低，適合鍾意偏茶感嘅朋友。開飯仔試嘅係哥倫比亞厭氧處理豆，聞起嚟有帶甜嘅桂花香，熱飲係類似荔枝、蜂蜜嘅甜香，放涼後酸度提升就會似檸檬茶，Aftertaste甘甜。
 

鴛鴦（$46）

港式同意式Fusion嘅另一例子，呢杯鴛鴦係用茶餐廳每日沖泡嘅紅茶茶膽，配搭意式濃縮咖啡沖調。飲落先有咖啡嘅醇香，然後慢慢滲出奶茶嘅茶香同回甘，層次分明，而且無一般茶餐廳鴛鴦嘅苦味。
 

朱古力茶（$46）

茶飲選擇亦多元化，比較特別嘅有呢款朱古力茶。其實係用可可沖泡而成，所以聞起嚟有非常濃郁嘅朱古力甜香，仔細聞仲帶少少果仁香，飲落就相當清爽，味道微甜完全無罪惡感！
 

Plan B Cafe
地址：尖沙咀山林道3號協榮商業大廈地舖

文、相：Cathy