農曆新年就快到喇，又到咗食團年飯嘅時候。要團圓又點少得食湯圓呢？年年都係食中式傳統湯圓，你唔悶，開飯仔都覺得悶啦！今年不如搞搞新意思，帶親友去食吓啲新奇趣怪嘅湯圓喇。
外脆內軟 燒芝麻湯圓 川燒
串燒就食得多，但燒芝麻湯圓就真係第一次見。呢間四川風味嘅串燒店川燒非常受歡迎，唔少明星客人都棒場，呢款燒芝麻湯圓外層燒到煙韌無比，入面嘅芝麻蓉好香，外脆內軟嘅配搭天衣無縫，好多食家試完都讚不絕口，忍唔住再返嚟食過啦。
養生糖水店 糖不甩三食 227甜棧
（圖：four_month、missjans）
227甜棧以售賣養生甜品為主，有一般傳統中式湯圓、亦有近年最hit嘅芋圓，但開飯仔今次想介紹呢款糖不甩三食。單睇個名，已經估到呢款甜品係有三種食法，分別由原味同綠茶味嘅煙韌丸子配上黃豆粉、綠茶粉同傳統糖不甩嘅椰絲花生，一款甜品就可以滿足晒幾個唔同口味嘅朋友。
紫皮黃心湯圓 魔法甜品屋
（圖：starki、chevonnetang）
位於粉嶺嘅魔法甜品屋有多款自創甜品，而呢款皇子湯圓燉椰皇就係呢到嘅招牌食品。單睇外表，你可能會以為紫色皮就一定係用紫薯整，只可以講少年你太年輕了。呢款湯圓用紫米做皮，入面包住味道香濃嘅奶黃餡，用埋燉椰皇做底，冬天食呢個暖笠笠嘅甜品就夠晒warm啦。
透明芒果湯圓 天然甜品
入長洲食芒果糯米糍就聽得多喇，長洲嘅芒果湯圓你又試過未？晶瑩剔透嘅芒果湯圓配上自家製雪圓，湯圓外層係透明嘅蒟蒻，包住香甜芒果，味道好清新。雪圓就以花生包住外皮，用雪糕做餡，口感有啲似糯米糍，好創新。鍾意食榴蓮嘅朋友仲可以揀埋榴蓮布甸做底，因為呢度嘅榴蓮布甸味道重果香，又軟滑，都值得一試！
朱古力麥精湯圓 糖人佳
（圖：ChristinaYuen、小柴BoBo）
用麥精配朱古力湯圓，聽落個組合好似好夾硬，事實就相反，唔怪之餘仲好好食添。糖人佳嘅朱古力湯圓入面夾住軟心熱朱古力，一咬落去成口都係朱古力嘅感覺真係好幸福啊。加埋熱麥精，令人回憶起讀書時代冬天一定要飲熱麥精嘅畫面，搞到開飯仔都有少少感觸添。
惹味咸湯圓 西關粥品
（圖：Pen、ronaldthefoodie）
有無諗過湯圓唔一定只係限制於甜品？湯圓都可以咸食㗎！元朗呢間傳統粥店西關粥品嘅咸湯圓就吸引咗唔少區內嘅捧場客，當然係有佢嘅過人之處。咸湯圓嘅質感有啲似年糕，而咬落去嘅口感就似芋圓，配上咸咸地嘅湯底同配菜，加埋店內嘅辣菜脯，相當惹味，令人食指大動。
上海傳統生湯圓 民豐粉麵行
（圖：ringow）
最後要介紹嘅係位於荃灣嘅民豐粉麵行，呢度賣嘅傳統上海水餃同湯圓都好出名，每日都吸引唔少人專登嚟排隊買。生湯圓皮煙韌軟滑，入面包住滿滿嘅豬肉白菜餡料，調味適中，人人都一試難忘。睇嚟下次火鍋想加配料要嚟幫襯吓佢喇！
讚好OpenRice專頁！