原個椰皇甜品一向都好有巿場，一匙一匙咁嗶，一下一下咁刮，係食得滋味啲嘅。椰皇鮮奶燉蛋白仲要有美顏美肌之效，就更加受女生歡迎啦。呢幾日咁凍，最啱就係食返碗熱辣辣嘅椰皇暖下心！
滑捋捋椰皇鮮奶燉蛋白 Home Sweet
圖：原個椰皇鮮奶燉蛋白，雖然就咁睇落白雪雪好清，但係椰香味十足，蛋白入口滑捋捋，仲滲有鮮奶香。食完記住刮埋啲椰肉喎，好甜。
良心椰皇 甜入心
圖：呢間甜品舖有幾款椰皇系列，焦糖布甸椰皇子入面有招牌焦糖布甸啦、自家製椰汁啦、新鮮椰皇果凍，仲有肯刮就有嘅椰皇肉，一個椰皇變奏出多種口感，甜度亦有層次。想養顏啲仲可以加埋桃膠添。
留意返嚟緊星期四(20/2)下晝2點，佢哋仲會派口罩畀瀝源村同禾輋村內有需要嘅朋友同長者，而凡捐出口罩一盒50個嘅善心人，仲可以即享一個鐘甜品放題添！
美顏桃園燕 金滿堂甜品
圖：講到美顏，各位女生嘅top 3 可能即刻會數到有燕窩同桃膠等，呢度一個「桃園燕」就包晒啦~椰皇內有齊燕窩、清心丸、芋圓同桃膠，樣樣料都有咬口，芋圓煙韌，蛋白滑溜。至於椰皇燉湯圓則係呢度嘅皇牌，丸子控要試。
焦糖椰皇燉蛋白 糖宮甜品專門店
圖：雖然開飯仔都知熱食係養生啲，但有時總係癮係想食凍嘢，仲要呢度嘅冰版椰皇燉蛋白面層，有層焦糖喺面添呀，好鬼吸引。焦脆香甜，底下嘅椰皇肉又清甜，下層嘅蛋白亦夠嫩滑。
超多款椰皇系列 Sweetheart
圖：荃灣呢間甜品舖，成日都好多人排隊，雖然款式多多，但去到一定要試椰皇系列，主打嚟！就咁一個椰皇燉蛋白已見真章，椰味香濃但又唔會搶晒啲蛋香，甜度適中。想多啲口味嘅仲有椰皇雪燕、椰皇蛋白三色芋圓、椰皇芒果等等，最豐富嘅應該係椰皇桃膠花膠雪燕！全部即叫即燉，所以要畀啲耐性等下啦。
文：Kar
