灣仔打工仔有口福啦！由前米芝蓮二星餐廳主廚掌舵嘅全新烘焙品牌登陸灣仔，選址喺上班族聚集嘅商廈內。除咗每日新鮮供應各式各樣嘅麵包外，仲有多款法式甜撻、蛋糕同埋咖啡特飲，無論做早餐或者下午餐都唔錯。

前米芝蓮二星餐廳主廚坐鎮 親製限量千層酥

烘焙熱潮似乎有增無減，灣仔近日又出現一位新成員——OH! MY BREAD。麵包店走木系無印風路線，入到店舖可以清楚見到三個區域，包括即沖咖啡區、甜品櫃及麵包櫃。主理人係年僅29歲、曾任職米芝蓮二星餐廳主總嘅Cyrus Yan（甄栢揚）。

主總Cyrus同時曾榮獲Tatler Dining嘅Best Pastry Chef Award

造型好似雞蛋仔嘅蜂巢千層酥，係主廚其中一款得意之作。呢款選用法國進口麵粉同牛油手工製作酥皮，焗成後雖然外型好似雞蛋仔咁，可以遂粒遂粒食，但內裡層次分明，入口酥脆同時帶輕盈感，成為創新甜品：酥皮香脆版本嘅雞蛋仔蜂巢千層酥。

雜莓蜂巢千層酥加上自家製吉士醬，同酸甜莓果好夾

開業初期，蜂巢千層酥會不定期限量出現，其中堅果口味將港式風味融入法式甜品內，加上Cyrus自家炒製嘅焦糖果仁配特調榛子醬，香氣濃郁，食落甜而不膩！

堅果蜂巢千層酥有豐富嘅層次感

來一場法式甜品慰藉！

特色甜品點止咁少呢？嚐甜朋友推介試吓焦糖果仁朱古力撻同柚子撻，前者為朱古力迷度身訂造，朱古力撻皮搭配85%黑朱古力內餡，頂層加上自家炒製焦糖果仁同榛子醬，味道濃厚好rich。後者選用日本柚子果蓉同秘製柑橘醬，最後放上微炙義式蛋白霜，酸酸甜甜好開胃～

焦糖果仁朱古力撻（左），柚子撻（右）

呢度仲有法國南部嘅經典甜品Tarte Tropézienne，麵包質感似布里歐修麵包，咬落蓬鬆有空氣感。中間內餡夾有橙花忌廉，味道清新，可以獨食一個！

橙花聖托佩塔入口輕盈，唔會太膩

另有其他蛋糕款式，如焙茶巴斯克（左）同草莓戚風蛋糕（右）

亦有牛角包、貝果、甜酥等包款

早餐+鹹點其他選擇

麵包店位於灣仔辦公室地段，亦有照顧打工仔需要，陸續推出早餐、鹹點、沙律同咖啡選擇。快食之選推介方便易食嘅三文治，每日新鮮現做，以Focaccia同Ciabatta為基礎，配上煙火腿、煙三文魚、煙牛肉同煙雞胸，都幾飽腹㗎。

煙雞胸Focaccia（左），煙三文魚Ciabatta（右）

同場仲有24款咖啡特飲，圖為Flat White（左）及Espresso Tonic（右）

OH! MY BREAD
地址：灣仔港灣道26號華潤大廈1樓102-103號舖

文：Sharon
相、片：Yan Yan