再飛日本呢個願望，由年頭等到而家都唔知幾時先實現到！想食日本風味嘅美食，就惟有喺本地著手喇。灣仔最新會開一間和牛壽喜燒專門店，主力提供關西風嘅壽喜燒，同日本A5和牛，另外亦會有多款鍋物供應。

由於餐廳係屬於全港最大嘅和牛入口商集團，所以就可以用一個較低嘅價錢，供應嚟自日本九州自家農場直送嘅靚A5和牛，既無激素，亦無抗生素。

壽喜燒二人前包括有精緻嘅前菜、和牛壽喜燒、季節野菜盛盒、讚歧烏冬同甜品，好豐富！

前菜都好有心思，酸酸甜甜嘅柚子大根，好醒胃；三色柚子蕃茄味道清新，建議由淺色嗰粒食起，味道會愈嚟愈濃。最令人心心眼嘅一定係黑毛和牛他他，加入咗開心果碎同鵪鶉蛋，撈勻食啖啖都係咁爽滑。

主角當然係日本產特選A5黑毛和牛啦，大大片一啲都唔吝嗇，每片嘅油花分佈平均。關西風味嘅壽喜燒，係會先將空鐵鍋加熱，輕輕煎烤牛肉兩面就食得，然後先再加壽喜燒汁再煮其他肉類同蔬菜。店員會先為每枱客人示範，先再交返畀客人自己調製。

第一片牛肉最好就淨係點蛋汁食，咁樣可以食得到濃郁嘅牛肉原味，同時有陣陣蛋香，和牛油脂溶化而唔油膩。第二片起，就可以再加多啲其他調味料，例如青檸、山椒、黑七味等，各有唔同風味，鹹香辛辣都有。

壽喜燒汁由餐廳自家製作，鹹甜度適中，唔會過濃，充份發揮到牛肉嘅甘香。加入季節野菜盛合同讚歧烏冬後，亦相當惹味，因為芋絲呀大根呀等等全部都係索汁一流！

 北海道產夢之大地豚蔥絲鍋同樣推介，蔥絲仲可以無限任加！

SUKIYAKIYA
地址：灣仔港灣道30號新鴻基中心2樓2A-1鋪
預計開業日期：7月14日

文、相、片：Kar