烏冬控企出嚟！烏冬就成日有得食，但要搵到間好食嘅都唔係咁易。旺角最近就新開咗間手打烏冬專門店，烏冬會用特製石鍋呈上，保證客人食到最後一啖都仲係熱辣辣，石鍋嘅熱力仲會令湯底嘅味道入哂烏冬到。湯底選擇都有成五款，而且每一款都足足熬咗12小時，呢個冬天食就最啱啦～

呢度係一間家庭式經營嘅小店，大廚有十幾年烹飪經驗，負責人Yanni話，之前有試過做車仔麵同日式料理等，但最後成績都唔係咁好，覺得要專心做好一樣食物，所以就開咗呢間烏冬專門店。

安格斯牛肉石鍋手打烏冬配山地獄辛辣湯($74)

石鍋可達攝氏300度，所以上枱果陣仲係熱辣辣。山地獄辛辣湯即係泡菜辛辣湯，湯底用咗大廚自己調製嘅泡菜去熬，辣度適中，同時保留住泡菜嘅辛香味同酸味，好開胃！牛肉係美國安格斯牛肉，利用石鍋嘅熱力煮熟佢，等佢微微紅嘅時候食就最軟腍，而且牛味都夠重。

照燒雞扒石鍋手打烏冬配黑松露香菇湯($68)

黑松露香菇湯係店內最受歡迎嘅湯底，用咗牛肝菌、天使菌、上等菇乾等八種菇類同日本空運乾菌熬成。食落菇菌味香濃，味道鮮甜，湯底呈現深啡色，每一條烏冬都吸哂湯底味道。照燒雞扒係自家醃製，食落惹味之餘仲好厚身添！

新活蜆石鍋手打烏冬配魚介湯($78)

魚介湯加咗鏗魚乾、小魚乾、柴魚乾、昆布同乾貝粉等材料熬製，味道濃而不膩。佢地每日都會去街市買新鮮蕃薯蜆，食落無沙得嚟大大隻，好新鮮，仲有好多隻添！

岩鹽燒牛舌($48)、關西風石燒流煎餃子($35)

小食都有幾多選擇，煎餃子夠惹味，牛舌都燒到啱啱好～

溫馨提示，石鍋烏冬只有晚市先有供應，不過其他時間都可以食到同款湯底嘅烏冬架～

石鍋堂

地址: 旺角通菜街2A-2P號鴻光大廈地下D號舖