沖繩料理同一般日本料理好唔同，食材、做法都係當地獨有，好似海葡萄、苦瓜、水雲及本和香糖等，天然健康，所以當地人都特別長壽。不過喺香港食到沖繩菜嘅餐廳唔算多，而家喺Café&Meal MUJI就可以食到喇！
番茄萵筍豚肉沙律
Café&Meal MUJI將於9/3推出全新春季餐牌，其中Found DELI企劃，旨在搜尋全球各地時令又地道食材，以當地烹調方法帶出風味。而第一個主題就係沖繩，總廚更親身去沖繩學習煮法及特色，將沖繩嘅飲食文化帶返嚟香港。
沖繩料理多以豚肉、「島野菜」如苦瓜、海藻入饌，用鰹魚高湯調味，較多蒸煮、熱炒煮法，保留食材營養及原味。沖繩套餐就有齊沖繩煮東坡肉、菠蘿苦瓜沙律、拌炒昆布絲三款小菜，五花腩先烚熟及壓製，去掉多餘脂肪，再加泡盛酒、黑糖慢慢炆煮至入味，食落香口但唔會太肥膩。
沖繩套餐 $128
總廚知道好多人唔食苦瓜，以沖繩檸檬汁、黑糖醃24小時，減輕苦澀味，食落爽脆，有點似甘甘哋蘋果。配埋菠蘿、甘筍，酸酸哋清新開胃。拌炒昆布絲同樣清爽，有豐富礦物質。套餐仲包埋十六穀飯、水雲豆腐湯及紫薯撻，飽肚又健康。
更多飲食潮流： |
其他春季料理亦有唔少沖繩元素，好似烤魚沙律伴海葡萄、番茄萵筍豚肉沙律、水雲味噌蒸比目魚柳及日式黑糖醬汁煮牛小排等，甚至係琉球紅茶，都用咗當地食材或者烹調方式，食落清淡但好舒服。
烤魚沙律伴海葡萄、水雲味噌蒸比目魚柳
昆布大根拌帶子、椰菜花露筍馬鈴薯奄列
日式黑糖醬汁煮牛小排、溫泉蛋拌野菌多士
甜品、麵包都有新出品，首選伯爵茶及芝麻戚風蛋糕，口感輕盈但香濃。仲有牛油軟包、菠蘿撻及香蕉撻、本和香糖布甸等。麵包就用上北海道石臼小麥粉，十勝小麥連胚芽及麥麩一齊慢磨，保留麥香及甜味，質感鬆軟帶微糯，香港先有架咋。
琉球紅茶 $45/壺、伯爵茶戚風蛋糕 $40
黑芝麻戚風蛋糕 $40、菠蘿撻 $40
牛油軟包系列
石臼小麥粉麵包系列
菜式可自選3至5款，配餐湯、白飯或十六穀飯，價錢為$95-$118。所有新菜式供應至6月，全線分店有得食。想食天然健康嘅日本料理，不妨試試佢。
文、相、片：Perrins