海鮮同火鍋本身就係香港人嘅至愛，兩樣加埋一齊更加係無得輸嘅配搭。旺角呢間標榜「有味精，即回水」嘅新火鍋店就有唔同海鮮鍋底，好似大石砸死蟹煲就用足一斤膏蟹，火焰卜卜蜆呢就有近1.5斤蜆配秘製辣酒湯。仲有咩特色值得留意？睇開飯仔慢慢介紹啦。
 

好滾得位於一座大廈七樓，玻璃窗增加空間感。餐廳以中國功夫同熊貓做靈感，唔單止貼上唔同「邊爐秘笈心法」，連碗碟都係仿竹設計，甚有玩味。唔好以為得Gimmick，實則坐鎮餐廳嘅行政總廚葉聖欣師傅大有來頭，唔單止入廚超過30年有「澳門教主」之稱，而且擅長創新Fusion菜。
 

馳名大石砸死蟹（新張期間21:30前試食價$268，原價$448）

因此餐廳所有鍋嘅用料唔單止足料，而且配搭上面亦非常用心。招牌大石砸死蟹其實係香辣花甲膏蟹煲，差唔多霸咗半個煲咁大嘅係菲律賓膏蟹，餐廳特別揀重1斤2兩嘅新鮮膏蟹，特點係多膏鮮甜而且無泥味。再配以花甲、蕃茄、芫荽、蘿蔔等配料，同總廚用33種食材熬製嘅上湯。
 

食之前唔好貪快，建議焗一陣確保蟹肉已經焗熟，二嚟蟹膏嘅鮮味流到湯中間更滋味！蟹膏夠香之餘，蟹肉都相當彈牙。秘製湯底富鮮味，帶少少鹹同辣味，配海鮮或者肉類都非常夾。而煲底嘅蘿蔔同菇可以留到最後，吸收曬湯底同海鮮味道再食。
 

火焰卜卜蜆煲（新張期間21:30後試食價$98，原價$198）

想再食辣少少？無問題，呢度嘅火焰卜卜蜆煲鮮味同辣勁兼具。近1.5斤新鮮生蜆會喺席前用油、蒜蓉同紅蔥頭先爆香，再加少少威士忌同伏特加酒然後點火，最後倒入總廚以各種藥材、辣椒、香料同酒等共超過40種材料熬製嘅辣酒湯。煲滾聽到蜆殼綻開發出嘅卜卜聲就食得啦！
 

主角蜆肉雖然唔算非常肥美，但開飯仔食到成碟殼都無一粒蜆肉有沙，值得一讃。而辣酒湯底其實唔會一味得個辣字，所以蜆肉食起嚟先品嘗到鮮味，然後到酒香，最後辣勁先會喺舌根涌上嚟。酒同藥材都係以香味為主，唔會食到苦味。味道有層次又足料，連後加嘅湯亦係每日用鮮魚、蘋果同梨熬嘅魚湯，食得出用心。
 

手打野生紅蝦松露丸（半份）（$58）

配料都花咗唔少心思，當中手打丸餃當然係必食啦。紅蝦松露丸單睇賣相就知黑松露醬落得幾重手，食落唔算非常彈牙，但起碼唔會覺得自己好似食緊粒膠咁韌。黑松露香味果然突出，唔會畀湯底味道蓋過。
 

芫荽豬肉餃（半份）（$42）

餃子亦皮滑足料，作為半個芫荽友嘅開飯仔覺得芫荽碎可以再落多少少，唔係嘅話一兩粒真係唔係幾夠喉。
 

鮮炸紫菜響鈴（$68）

湯底咁吸引，當然唔少嗌返份響鈴嚟食下。響鈴新鮮炸起香口唔油膩，浸落湯底三秒夾起，吸滿湯汁又唔會太淋，夾層嘅紫菜再增加一重香味。
 

開飯仔幫大家問過負責人，新張期間試食價嘅優惠會做到2018年1月尾，至於之後會唔會再提供優惠，大家可以上佢地Facebook睇睇。採訪期間電話一直響個不停，原來係唔少人趁最近轉涼打去Book枱，你都想去試下嘅話不妨先網上訂座，仲可以賺埋額外積分𠻹。
 

好滾得
旺角彌敦道558-560號譽發廣場7樓
*價錢最後以餐廳出示為準，另加一服務費

文、相、片：Cathy