燒雞翼～我鍾意食～最近見到港島一間30多年老字號餐廳終於衝出原區，進軍九龍開首間分店，並同樣以金牌脆皮燒雞作為鎮店名物，開飯仔當然要趁新開業試試新店質素如何。今次仲會去埋新蒲崗，實測據說人氣男團組合MIRROR都鍾意食嘅燒雞店，即睇兩間食後感！
港島最強燒雞新分店 走快餐店模式
餐廳總店屹立灣仔約30年，向來以大件夾抵食成為當區街坊同打工仔食堂，招牌名物燒雞更係餐廳人氣嘅原因之一。最近餐廳喺紅磡區開設新支線，店名加上「宅急便」三隻字，透露出新店同總店有些少分別。新店負責人司徒先生表示：「呢度同灣仔店唔同，新店係想行快餐店模式，客人可以自己喺店門嘅點餐機落單後，等叫冧巴取餐，成個流程會快好多。」開飯仔由落單到取餐，成個流程唔使5分鐘搞掂。
新分店走快餐店模式，希望可以應付附近打工仔嘅需求
去過灣仔總店薔紅嘅你就知道，一打開餐廳菜單會見到琳瑯滿目嘅菜式，又有小炒海鮮，又有常餐焗飯，款式多到唔知點揀好。嚟到新副線薔紅宅急便，餐牌相對簡單，因為司徒先生只係將灣仔店「賣得」嘅款式搬去新店，例如金牌脆皮燒雞、酥炸脆皮牛腩、鐵板餐等等，滿足到想試燒雞又想食快餐嘅街坊。
金牌脆皮燒雞可跟配飯、意粉、薯條或沙律 ($88)
嚟到一定要試吓$88金牌脆皮燒雞，沿用總店做法，選用3斤重三黃雞同超過20款調味醃製，半隻雞上枱都幾霸氣，表皮燒至金黃香脆，色香味俱全。撕開見到陣陣油光好吸引，雞肉嫩滑唔乾，連皮食撞出外脆內軟嘅衝擊感，基本上唔使沾胡椒粉同雞醬都好夠味。跟配主食4選1揀咗薯條，驚喜地灑有粟米濃湯粉，可惜食落腍身唔熱。
半份燒雞都好有分量，做到皮脆肉香，性價比超班
除咗燒雞，司徒先生另外推介熱賣酥炸脆皮牛腩，特別挑選半肥瘦牛腩，先經長時間炆煮令肉質鬆軟，再酥炸上枱，入口外脆內軟，同平時食到嘅牛腩菜式好唔同。
酥炸脆皮牛腩可選配飯或意粉（$68），淋埋咖喱汁更惹味
新店限定供應爆打香水檸檬茶，真係飲到粒粒檸檬果肉㗎～
薔紅宅急便
地址：紅磡崇志街28號地舖
古法荔枝柴爆汁窯燒雞 提前預訂先食到
位於新蒲崗嘅呢間路邊小店，由喺飲食界打滾30幾年嘅陳先生Dymo主理，小店憑古法窯燒雞喺流浮山略有名氣，後來搬到現址繼續主打燒雞，就連本港人氣男團組合MIRROR都係小店嘅常客！
陳老闆專心做好每隻燒雞，店內設有2個窯席燒製
原隻燒雞一定要提前預訂先食到，因為老闆真係逐隻逐隻雞即叫即燒。小店選用三黃雞混羊山雞，每日新鮮到港後，會運到工場用秘製醃料醃製並風乾，送到店舖仲要保持殺菌狀態，最後再用荔枝柴以高溫280度燒40分鐘，先做到色澤金黃又爆汁嘅效果。
小店選用嘅窯深1.2米，可以同時燒製約15隻雞，高溫逼出雞油同時鎖住肉汁
店內有少量堂食位置畀客人即場享用，陳老闆強調即叫即食一定最正，最能食到燒雞嘅原汁原味。老闆會附上手套同鉸剪，開飯仔先由最嫩滑嘅雞髀食起，一撕開即流出澎湃肉汁，畫面相當誘人！雞肉滑嫩一啲都唔柴，即使食到雞胸位置依然滑身，老闆仲建議雞肉可以一邊蘸流出嘅肉汁，一邊享用！
流浮山窯燒雞（$198/隻）燒到金黃色好吸引，持續有肉汁流出，做到燒雞嘅精髓
肉質、肉汁同風味都令人深刻，難怪有唔少回頭客捧場
流浮山窯燒雞
地址: 新蒲崗大有街14號萬星工業大廈地下C5B號舖
文：Sharon
相、片：Yan Yan
