鍾意享受日本串燒店氣氛嘅朋友，尖沙咀呢間博多串燒及串炸專門店就啱晒你！餐廳由日籍總廚木村潤一郎主理，特別選用由高溫蒸燒日本橡木製作而成的備長炭處理串燒；裝潢方面一貫日本餐廳傳統，以木色為主調，除咗吧枱位置外更有埋二人及四人卡位，約埋朋友嚟邊食邊傾就至啱～

燒鳥料理

餐廳其中一個主打就係燒鳥料理，包括自製雞肉丸配黃金蛋、雞心、雞腎、雞皮及雞心頂。選用由日本奈良引進嘅「大和妃子雞」，略帶紅色及有適量脂肪，肉質相對較彈牙而且肉味濃郁。私心推介雞肉丸及燒雞皮，前者點埋生蛋食夠惹味，後者燒得香脆又唔油膩～

博多串燒

如果想食fresh啲，可以試埋呢三款博多串燒，分別係牛油果豚肉卷、富士蘋果豚肉卷及日本香蔥豚肉卷。用鹿兒島豚肉卷住日本時令蔬果，味道清新，食多幾串都無問題！

日式串炸

除串燒外，呢度都有博多串炸供應，如東京灣鮑魚及揚帆立貝串，彈牙而且鮮甜，鍾意食海鮮嘅朋友不可錯過～而天婦羅明太子紫蘇卷有微微鹹香，紫蘇葉味都幾重，怕紫蘇葉嘅朋友就未必鍾意啦～

總廚木村先生家族秘傳宮崎南蠻炸雞1956

呢味係總廚祖傳秘方嘅炸雞，雞肉厚身嫩滑，配埋秘製醬汁食又幾出色～

另外餐廳仲有隱藏MENU內嘅雞肉料理宮崎式雞腿肉炭火鐵板燒，利用大火燒熟，有陣陣火烤過嘅香氣，想食就要直接問店家落單啦！

自家製蟹膏冰鎮鮮菜條

食咁多肉前當然要食返前菜清吓腸胃，自家製蟹膏冰鎮鮮菜條蔬菜爽脆鮮甜，點蟹膏又幾夾～

木戶

地址: 尖沙咀棉登徑8號地下G12-13號舖

文、相、片: Yanica