講起牛頭角大家可能都會先諗起牛頭角下邨，雖然裡面唔少街坊小店已經因為清拆而結業，但如果咁就以為牛頭角無特色美食嘅話，咁就大錯特錯啦！無論係屋邨區定係工廈裡面，一樣有唔少獨具一格嘅餐廳，無論係炸雞髀老店定班戟車仔檔，都值得你入嚟一試！
炸雞髀皮脆似薯片 日月星快餐
講起炸雞髀，除咗最近連續開分店嘅三多之外，仲不得不提日月星呢間街坊老店。佢地嘅生炸雞髀一上枱就已經聞到香噴噴，雞皮炸透後薄脆程度同薯片有得比，加上裡面嘅雞肉亦相當多汁嫩滑，醃料味道唔重但足夠蓋過雪藏味。餐廳係港式快餐店格局，唔想食得太趕建議外賣慢慢嘆，無飯不歡嘅仲可以嗌多個飯盒。
惡魔芝士三文治 Little Devil Grilled Cheese & Dessert
呢間小店真係店如其名非常邪惡，因為佢地賣嘅就係九款唔同口味嘅香烤芝士三文治！自認芝士Fans嘅話必試芝士三重奏，入面有車打芝士、瑞士芝士、水牛芝士、煙肉同磨菇，香得嚟又唔會太膩。更邪惡嘅惡魔之子有水牛芝士通粉、蕃茄肉醬同焦糖洋蔥，Mac n cheese夠香夠邪惡，夾埋香甜Juicy洋蔥食下食下又一件！
車仔檔窩心Pancake 無名班戟夾餅
唔少舊區都總有一兩個街坊細細個幫襯到大嘅車仔檔，牛頭角嘅話應該就係呢檔Pancake，獨沽一味只賣一款班戟夾餅：即煎Pancake再夾牛油、花生醬同煉奶，有啲似其他小食店嘅格仔夾餅。但用Pancake代替格仔餅，更鬆軟又有蛋香，簡單而滿足。不過留意返伯伯唔定期唔定時擺擋，想食就要睇緣分喇。
懷舊主題手工漢堡 漢堡B
呢間商場裡面有個懷舊主題嘅Food Court，入面最受歡迎嘅就係呢檔主打Handmade牛肉漢堡扒嘅漢堡店。牛肉漢堡扒差唔多有一吋厚，咬落夠厚身唔死實又Juicy，無論搭邪惡芝士定清新菠蘿都咁夾。同朋友去仲可以一齊開心Share埋佢地嘅脆雞翼同芝士醬熱狗，最緊要係價錢相宜，好過次次去連鎖快餐店吖嘛。
文青系新派西餐 談風：vs：再說
圖：CLan
裝修過嘅工廈餐廳總畀人一種文青Feel，而且呢間餐廳仲要由本地獨立樂團開設。不過唔好以為咁樣代表嘢食好求其，相反廚師非常畀心機，除咗每個月換餐牌之外，食物配搭同選料亦非常花心思，例如會有香港少見嘅撒丁米。食物有新鮮感之餘，賣相仲相當精緻，最啱放上Instagram呃Like。
驚喜街坊甜品店 金滿堂甜品
呢間甜品店係唔少牛頭角街坊嘅心頭好，唔單止因為甜品選擇多，亦因為出品質素保持到。最特別嘅係咖啡媽媽，即係咖啡果凍伴炭燒雪芭，無論果凍定雪芭都有非常濃厚嘅咖啡香味，餘韻悠長，雪芭嘅合桃碎更加係畫龍點睛。仲有唔少特色甜品，例如榴連烏冬、焦糖奶茶刨冰同金玉滿堂，即係改良版嘅楊枝甘露，小心選擇恐懼症發作呀。
浮誇派古法梅菜扣肉 華安餐廳
圖：mohkc
最後介紹多一間港式餐廳，冰室格局不過環境相當新淨。招牌菜係古法梅菜扣肉飯，梅菜扣肉用缽仔分開上，扣肉肥瘦相間加埋舖滿嘅梅菜，足夠令人忘記減肥大計。咖哩牛根腩飯嘅咖喱汁夠香口，牛筋腩有豐富膠質，覺得飯太飽嘅話轉迷你Size配多士都仲得。醬汁豬手飯同鮑汁撈麵都值得一試。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
隨時接收最新資訊
讚好OpenRice專頁！