香港人聽到放題任食就開心，仲要係牡蠣任食喎今次，不得了！中環新開嘅一間居酒屋，原來大有來頭，係由日本北木島喜多嬉牡蠣養殖場開設，供應自家養殖嘅牡蠣。除咗有得任食牡蠣外，亦有多款牡蠣料理。牡蠣迷準備好朝聖未？
(左) 九品頭盤 ︳(右) 牡蠣茶漬飯
牡蠣放題先會有一客九品嘅頭盤，然後就可任食牡蠣刺身同鐵板烤牡蠣。60分鐘 $398/位，90分鐘 $498/位。頭盤菜品會因應時節而改變，暫時呢季會有日本直送象拔蚌刺身、喜多嬉牡蠣茶漬飯、二色燒活白鰻、天婦羅秋葵、手工月見燒鳥串、天婦羅紫蘇葉吞拿魚蓉、喜多嬉牡蠣刺身、時令沙律同日式漬物。其中個茶漬飯，係以牡蠣高湯製作，啖啖都食到淡鮮嘅蠔香；象拔蚌刺身則爽口鮮甜。手工月見燒鳥串點埋蛋黃一齊食，夠晒惹味。
任食：牡蠣
新鮮到港嘅牡蠣大大隻，口感爽滑，肉質肥美，帶海水鹹香，主廚更特意配上土佐酢啫喱、辣蘿蔔蓉同蔥花，提鮮之餘亦可消膩，食多幾隻都唔怕。
任食：鐵板烤牡蠣
任食：配搭6款醬汁
餐廳設有大鐵板，放上牡蠣後再冚蓋煎烤，一開蓋嗰陣，即刻傳出陣陣蠔香。煎香後嘅牡蠣帶有微溫，另外仲有6款醬汁配搭，分別係秘製酸汁、XO醬、芝士醬、蒜蓉醬、泰式辣醬同孜然醬。不過部分醬汁略嫌口味太重，有機會搶咗蠔嘅鮮味。比較推薦秘製酸汁同蒜蓉醬，二者均較融入同有提鮮作用。其實牡蠣本身好鮮甜，就咁原隻進食都已經好滋味。
單點：牡蠣天婦羅
如果想試多啲牡蠣嘅可能性，更可單點其他牡蠣料理。例如牡蠣天婦羅，外層薄脆，一啖咬落去中間嘅牡蠣仲會爆汁，口感又juicy又豐富。
單點：牡蠣五島手延烏冬：(左) 湯烏冬 ︳(右) 撈烏冬
烏冬有湯烏冬同撈烏冬揀，烏冬較平時食開嘅幼細，同時亦更滑身同彈牙，索湯力唔錯。湯烏冬當然都係用牡蠣高湯製作啦，仲有粒粒細蠔肉食到添；而撈烏冬嘅味道比賣相驚艷，每條烏冬都吸收晒牡蠣高湯嘅濃縮精華，啖啖濃郁惹味，大滿足。
單點： (左) 牡蠣釜飯 ︳(右) 鰻魚牡蠣便當
鰻魚牡蠣便當啱晒貪心仔，一次過可以食晒三河灣鰻魚同喜多嬉牡蠣，將兩地盛產嘅海鮮集埋一齊，滿足海鮮控嘅願望。
各類串燒，包括燒鳥皮蝦膠串、牡丹蝦、燒鳥三角胸軟骨、活燒白鰻魚串。
喜多嬉牡蠣屋
地址: 中環擺花街1-7號一號廣場地下9號舖
文、相：Kar
